ნაციონალური მოძრაობის წევრი, დეპუტატი რომან გოცირიძე საბანკო განაკვეთზე ზედა ზღვარის დაწესებას და რეგულაციებს არ ეთანხმება და ფიქრობს, რომ საქართველოს საბანკო სისტემას "კონკურენცია გადაარჩენს".

ამის შესახებ რომან გოცირიძემ On.ge-ს მიხეილ სააკაშვილის განცხადებების საპასუხოდ უთხრა, სადაც მიხეილ სააკაშვილი ამბობს, რომ უნდა აიკრძალოს ბანკების არაპროფილურ ბიზნესებში შესვლა. გადავადებულ სესხებზე საპროცენტო განაკვეთი მკვეთრად უნდა შემცირდეს. უნდა დაწესდეს ზედა ზღვარი საპროცენტო განაკვეთზე.

"საბანკო განაკვეთების პრობლემას თავისუფალი კონკურენცია, დაბალი პროცენტები და უცხოური ინვესტიციების შემოსვლა მოაგვარებს", - განაცხადა რომან გოცირიძემ.

დეპუტატის განმარტებით, ყველაფერი, რის შესახებაც მიხეილ სააკაშვილმა ისაუბრა, პარტიის სავარაუდო გეგმებია და ზუსტ სამოქმედო ნაბიჯებს მას შემდეგ გაწერენ, რაც საბანკო ვალების ანალიზს დაასრულებენ.

"გზებზე ჩვენ ცალკე ვიმსჯელებთ, თუ რა და როგორ უნდა გაკეთდეს. ეს ყველაფერი არის ანალიზი. ჩვენ ვიცით, რომ ძალიან ბევრი ადამიანია, რომელიც მოვალეთა რეესტრშია, ვიცით ვადაგადაცილებული ვალები, მაგრამ არ ვიცით მათი ანატომია. ჩვენ შევისწავლით საბანკო ვალების სტრუქტურას, ვალების მქონე ადამიანების ფინანსურ და სხვა სახის მდგომარეობას, გავაკეთებთ ანალიტიკურ დასკვნას და შემდეგ გადავწყვეტთ, რა გზებით უნდა იყოს მოგვარებული", - განაცხადა რომან გოცირიძემ.

მისი თქმით, საქართველოს საბანკო სისტემა ბოლო წლების განმავლობაში მკვეთრად მონოპოლიზებული და პოლიტიკური გახდა.

"სახიფათო ვითარებაა, საბანკო სექტორში კონკურენცია შემცირდა. დიდი დარტყმა იყო, როგორც საფინანსო სექტორისთვის, ისე ქვეყნისთვის სოსიეტე ჯენერალის საქართველოდან გასვლა, ვინაიდან საქართველოში ამ რანგის ინვესტორი არ ყოფილა. ბანკი ქართუ, რომელიც უხეშად რომ ვთქვათ, ვაკის პარკთან პატარა ჯიხური იყო, დღეს საბანკო გიგანტად გადაიქცა. თიბისი, საქართველოს ბანკი, ბანკი ქართუ და ლიბერთი არის საქართველოს საბანკო სისტემის 85%. საბანკო სისტემა, რეალურად, ივანიშვილის ირგვლივაა კონცენტრირებული", - განაცხადა რომან გორიციძემ.

დეპუტატის თქმით, ხელისუფლებასთან დაახლოებული საბანკო სისტემა პოლიტიკურად, საფრთხის შემცველია საქართველოსთვის.