პარლამენტის დეპუტატმა პატრიოტთა ალიანსიდან ემზარ კვიციანმა განაცხადა, რომ ნეონაცისტური მოძრაობის ქართული მარშის შვიდი წევრი ციხეში ქრისტეს დაცვის გულისთვის ზის. ამის შესახებ კვიციანმა პარლამენტში სახელმწიფო უსაფრთხოების სამსახურის ანგარიშის მოსმენაზე განაცხადა.

"მართლმადიდებლებო, მინდა შეგახსენოთ, გილოცავთ ბატონო ვახტანგ [გომელაური] და მინდა შეგახსენოთ, რომ შვიდი ადამიანი ზის ციხეში ქრისტეს დაცვის გულისთვის და იქნებ რამე ჩაერიოთ და სამართლიანობა აღადგინოთ ამ მიმართულებით მაინც", - განაცხადა კვიციანმა.

19 მარტს ქართული მარშის წევრებმა რუსთავი 2-თან აქცია გამართეს. მათ მიაჩნდათ, რომ ტელეწამყვანმა გიორგი გაბუნიამ მორწმუნეთა "რელიგიურ გრძნობებს" შეურაცხყოფა მიაყენა, როცა 18 მარტს გადაცემა P.S.-ში იესო ქრისტეს ჯვარცმაზე ისაუბრა.

აქციაზე ქართული მარშის წევრებმა, რუსთავი 2-ის ჟურნალისტს დავით ერაძეს სცემეს. მათ გიორგი გაბუნიას მანქანას ალყა შემოარტყეს და სიტყვიერი შეურაცხყოფა მიაყენეს. პოლიციამ ქართული მარშის ექვსი წევრი დააკავა, მოგვიანებით კი კიდევ ერთი წევრი დააკავეს. მათ ხულიგნობა და ძალადობა ედებათ ბრალად.