თბილისის სასულიერო სემინარის სტუდენტები კომპანია აიისას წინააღმდეგ აქციას გამართავენ. ამის შესახებ სემინარიის სტუდენტმა გიგა ძამუკაშვილმა ფეისბუქზე დაპოსტა.

სტუდენტებს მიაჩნიათ, რომ აიისას მიერ წარმოებულ პრეზერვატივებზე წმინდანების და დღესასწაულების გამოსახვა კულტურული და ისტორიული ფასეულობების დაცინვაა. მათი თქმით, აპროტესტებენ ქრისტიანული საზოგადოების ეროვნული და რელიგიური გრძნობების შეურაცხმყოფელ საქმიანობას.

სტუდენტების თქმით, აქციის მიზანია პრევენცია, რათა ახალგაზრდა თაობა დაიცვან ეროვნული ფასეულობებისადმი ნიჰილიზმისგან. აქციის მონაწილეები მოითხოვენ, ხელისუფლებამ მიიღოს სპეციალური კანონი, ან ჩაიწეროს მუხლი კანონმდებლობაში ეროვნული და რელიგიური ფასეულობებისა და ღირებულებების შეურაცხყოფის შესახებ.

აქციის ორგანიზატორების თქმით, აქციის ჩასატარებლად კურთხევა პატრიარქისგან მიიღეს. ამ ინფორმაციის დასაზუსტებლად On.ge-მ სცადა საპატრიარქოსთან დაკავშირება. სატელეფონო ზარებს პრესსამსახურმა არ უპასუხა.

კომპანიასთან დაკავშირებით საქართველოს საპატრიარქომ უკვე გაავრცელა განცხადება, რომელშიც აიისას პრეზერვატივის დიზაინი "უზნეო თავგასულობად" შეფასა და რელიგიური გრძნობების დასაცავად ხელისუფლებისგან მკაცრი რეაგირება მოითხოვა .

მდუმარე სტუდენტური აქცია 19 აპრილს, 6 სთ-ზე, ყოფილი პარლამენტის შენობის წინ გაიმართება.