საპატრიარქო აცხადებს, რომ ბოლო დროს მორწმუნე საზოგადოების გრძნობების შეურაცხყოფისა და ღვთის გმობის გამოვლინებები გაძლიერდა.

საპატრიარქო მიმართავს მორწმუნეებს, ახალგაზრდებს, ინტელიგენციას, არასამთავრობო სექტორს, სახალხო დამცველს, ძალისხმევა მიმართონ, რათა სახელმწიფომ დროულად უზრუნველყოს რელიგიური გრძნობების დაცვა.

მათ განცხადებაში მაგალითად მოყვანილია კომპანია აიისას პრეზერვატივის დიზაინი, რასაც საპატრიარქო "უზნეო თავგასულობას" უწოდებს. ისინი ასევე ახსენებენ 18 მარტს, რუსთავი 2-ის ეთერში, გიორგი გაბუნიას განცხადებას ქრისტეს ჯვარცმაზე, რომელსაც "უტიფრობად, სარკაზმად და ცინიზმად" აფასებენ. საპატრიარქოს განცხადებით, ეს ყველაფერი საზოგადოებისთვის ღია გამოწვევად იქცა.

საპატრიარქო თავის განცხადებაში წერს, რომ ისინი მხარს არ უჭერენ ძალადობრივ ქმედებებს და მკვეთრ რეაგირებას ითხოვენ ხელისუფლებისაგან, ვინაიდან: "მორწმუნეთ (იქნება ეს ქრისტიანი, მუსლიმი, იუდეველი თუ სხვა) უსამართლობისა და დაუცველობის განცდა მოეხსნათ".

საპატრიარქოა ღიარებს, რომ გამოხატვის თავისუფლება, წარმოადგენს ფასეულობას, რომელიც დემოკრატიული საზოგადოების განვითარებისა და ადამიანის უფლებების დაცვის ერთ-ერთი მთავარი გარანტია. თუმცა, აღნიშნავს, რომ ამ უფლებით სარგებლობა დაკავშირებულია პასუხისმგებლობასთან და სხვისი უფლებებისა და თავისუფლების დაცვასთან.