რუსეთი დიდ ბრიტანეთს ყალბი ამბის გამოგონებაში ადანაშაულებს და სოლსბერის საქმესთან დაკავშირებით აფრთხილებს, რომ ისინი "ცეცხლს ეთამაშებიან".

გაეროს უშიშროების საბჭოს სხდომაზე, რუსეთის ელჩმა გაეროში ვასილ ნებენზიამ განაცხადა, რომ ბრიტანეთის მთავარი მიზანი რუსეთის დისკრედიტაცია და მისთვის უსაფუძვლო ბრალდებების წაყენებაა:

"ჩვენ ვეუბნებოდით ჩვენს ბრიტანელ კოლეგებს, რომ ისინი ცეცხლს ეთამაშებიან და ამას ინანებენ".

რუსეთის ელჩმა გამოძიებაში რუსული მხარის ჩართვა მოითხოვა. დიდი ბრიტანეთის წარმომადგენელმა გაეროში კარენ პირსმა კი მოსკოვი "ცეცხლის წამკიდებელს" შეადარა, რომელსაც საკუთარი გაჩაღებული ხანძრის გამოძიება სურს.

ყოფილი რუსი ჯაშუში სერგეი სკრიპალი და მისი შვილი იულია, ბრიტანეთის ქალაქ სოლსბერიში 4 მარტს ნერვო-პარალეპტიკური ნივთიერებით მოწამლეს.

სერგეი სკრიპალისა და მისი შვილის მოწამვლაში დიდი ბრიტანეთი რუსეთს ადანაშაულებს. ამის გამო ბრიტანეთის პრემიერ-მინისტრმა, ტერეზა მეიმ ქვეყნიდან რუსი დიპლომატები გააძევა. ბრიტანეთის მხარდასაჭერად 150-ზე მეტი რუსი დიპლომატი 30-მდე ქვეყანამ გააძევა. რუსეთი ყველა ბრალდებას უარყოფს და ამბობს, რომ რუსი დიპლომატების გაძევებას შესაბამისად უპასუხებს.

გაერთიანებულ სამეფოში ქიმიური იარაღის გამოყენების ფაქტი დაგმო საქართველომაც, შეუერთდა საერთაშორისო საზოგადოების პოზიციას და ქვეყნიდან ერთი რუსი დიპლომატი გააძევა.

გაიგეთ მეტი: