საქართველოს შინაგან საქმეთა სამინისტროს ინფორმაციით, 2017 წლის განმავლობაში, სამუშაო ადგილზე მომხდარი 128 უბედურ შემთხვევაზე დაიწყო გამოძიება. სასამართლოში კი მხოლოდ 11-ზე წარიმართა. მონაცემებს სახალხო დამცველი ავრცელებს.

ანგარიშის მიხედვით, გამოძიება შეწყდა 36 შემთხვევაში, 81 შემთხვევაში გამოძიება დღემდე მიმდინარეობს. აქედან სისხლისსამართლებრივი დევნა დაწყებულია 13 შემთხვევაში.

სახალხო დამცველი ხაზს უსვამს სამართალდამცავი ორგანოების მხრიდან საწარმოო პროცესის დროს მომხდარ უბედურ შემთხვევებზე დროული და ეფექტური გამოძიების წარმოების აუცილებლობას.

სახალხო დამცველი 2017 წლის ანგარიშში ყურადღებას ამახვილებს შრომის პირობების ინსპექტირების სახელმწიფო პროგრამაზე.

"ამ პროგრამით ინსპექტირების განმახორციელებელი ორგანოს უფლებამოსილებები არ გაფართოებულა და არც გაძლიერებულა, რის გამოც ინსპექტირების პროცესში გამოვლენილ დარღვევათა შესრულების მაჩვენებელი კვლავ მნიშვნელოვნად დაბალია", - ნათქვამია ანგარიშში.

საქართველოს შრომის, ჯანმრთელობისა და სოციალური დაცვის სამინისტროს ინფორმაციით, 2017 წელს შრომის პირობებზე შემოწმებას 169 დამსაქმებელი დათანხმდა, რის შედეგადაც შემოწმდა 169 კომპანიის 279 ობიექტი. ამ კომპანიებიდან განმეორებითი მონიტორინგი განხორციელდა მხოლოდ 33 ობიექტზე, რომლებზეც თავდაპირველი ინსპექტირების პროცესში გამოკვეთილი იყო 504 დარღვევა.

რემონიტორინგის შედეგად კი გამოვლინდა, რომ შესაბამისი რეკომენდაციების საფუძველზე გამოსწორდა 99 მათგანი.