სოფელი თაქალო და სკოლამდელი განათლების გარეშე დარჩენილი ბავშვები
![](http://ross.on.ge/2018/04/01/Foto_3_5ac103eda3900.jpg)
ფოტო: ადამიანის უფლებათა სახლი
"ხელისუფლებას დაავიწყდა, რომ სოფელი თაქალო არსებობს. არც გზა გვაქვს, არც სასმელი წყალი, არც სამედიცინო პუნქტი და არც საბავშვო ბაღი,”- ამბობს მარნეულის მუნიციპალიტეტის სოფელ თაქალოში მცხოვრები 31 წლის ელვინ ისმაილოვი.
თაქალო თბილისიდან 65 კმ-ის მოშორებით, აზერბაიჯანი-საქართველოს საზღვართან მდებარეობს. სოფელი, სადაც ამჟამად 1500-ზე მეტი ადამიანი ცხოვრობს, მარნეულის მუნიციპალიტეტში ერთ-ერთ დიდ სოფლად ითვლება. სოფლამდე მისასვლელი დანგრეული გზითაც ადვილად მიხვდებით, რომ აქ მცხოვრებ მოსახლეობას ბევრი პრობლემა აქვს.
51 წლის ზეინაბ მიკაილოვა, რომელსაც ორი შვილიშვილი ჰყავს, ამბობს, რომ ახლა ყველაზე მეტად ბავშვებს ქართული ენის სწავლაში დახმარება სჭირდებათ:
"საბჭოთა პერიოდში ჩვენ ყველანი რუსულად ვსაუბრობდით და ქართულის ცოდნა საჭირო არ იყო. ახლა ქართული თუ არ იცი, სამუშაოს ვერ ნახავ. ჩვენ სახლში მხოლოდ აზერბაიჯანულად ვლაპარაკობთ, სკოლაც აზერბაიჯანული გვაქვს. მშობლების დიდმა ნაწილმა ქართული არ იცის, რომ შვილებს ქართული ენის სწავლაში დაეხმაროს. საბავშვო ბაღი რომ იყოს, ბავშვები ქართულის სწავლას იქედანვე დაიწყებდნენ და კარგი იქნებოდა. მეზობელ სოფელ შულავერში საბავშვო ბაღი არის, მაგრამ იქამდე 15 კმ-ია. არა გვაქვს იმდენი ფული, რომ ბავშვები იქ ყოველდღე მანქანით ვატაროთ."
“მაღაზიაში პურის საყიდლად რომ მივდივართ, მაშინაც კი რუსულად ვლაპარაკობთ. ქართველებს ეს არ მოსწონთ. ჩვენც გვინდა, რომ ქართული ვიცოდეთ. ვცდილობ, რომ შვილშვილებს თვლა და წერა-კითხვა მაინც ვასწავლო, მაგრამ მოხუცი ვარ და ბავშვებს რეგულარულად ვერ ვამეცადინებ. სოფელში საბავშვო ბაღი რომ იყოს, პრობლემა შეგვიმსუბუქდებოდა. ჩვენ თუ ვერ ვისწავლეთ, ჩვენმა შვილებმა მაინც ისწავლონ,” - აცხადებს ჰამიდ მიქალოვი.
თაქალოელ ელვინ ისმაილოვს ხუთი წლის ბიჭი ჰყავს, რომელსაც საბავშვო ბაღში არასოდეს უვლია. ელვინი ამბობს, რომ თავის დროზე ბაღში არც ის დადიოდა და ამის გამო სკოლაში სწავლა და ქართული ენის შესწავლა გაუჭირდა: “ქართული არ ვიცი, რის გამოც პროფესიული განათლებაც ვერ მივიღე. არ მინდა, რომ ჩემი შვილიც იგივე პრობლემის წინაშე აღმოჩნდეს. ახლა ჩვენს სოფელში სპორტულ მოედანს აკეთებენ და ამისთვის დიდი თანხა გამოყვეს. სპორტული მოედანიც საჭიროა, მაგრამ ახლა ყველაზე მეტად ბავშვებს სკოლამდელი განათლება სჭირდებათ.”
თაქალო კაჩაგანის თემში შედის. კაჩაგანის წარმომადგენელი მარნეულის საკრებულოში, ხოსროვ ნამაზოვი აცხადებს, რომ თაქალოში საბავშვო ბაღის გახსნის მოთხოვნით მუნიციპალიტეტის მერიას უკვე მიმართეს: “მარნეულის მუნიციპალიტეტში 78 სოფელია, აქედან 70 სოფელში საბავშვო ბაღი არ არის. მერიას უკვე მივმართეთ და იმედი გვაქვს, რომ სექტემბრამდე თაქალოში სკოლამდელი საგანმანათლებლო დაწესებულება აუცილებლად ამოქმედდება."
საქართველოში, 2015 წელს ჩატარებული “მოსახლეობის კეთილდღეობის კვლევის” თანახმად, 3-5 წლის ბავშვების მხოლოდ 62.3% დადიოდა საბავშვო ბაღში. ეს მაჩვენებელი კიდევ უფრო დაბალია სოფლებში - 55.1%. UNICEF-ის ცნობით, ევროკავშირის 27 ქვეყანაში საშუალო მაჩვენებელი 82.6%-ია.
UNICEF-ის საქართველოს ოფისის განათლების პროგრამის ხელმძღვანელი მაია ყუფარაძე სკოლამდელი განათლების აუცილებლობაზე საუბრობს: “ბაღი - იგივე სკოლამდელი განათლება აუცილებელია ბავშვისთვის. საბავშვო ბაღში მიღებული ცოდნით ბავშვი სკოლისთვის ძალიან კარგად ემზადება და მისთვის აუცილებელ სოციალურ უნარ-ჩვევებს იძენს. არაერთი კვლევა მოწმობს, რომ ის ბავშვები, რომლებსაც მიღებული აქვთ სკოლამდელი განათლება, სკოლაში უფრო ადვილად სწავლობენ. გარდა ამისა, თანატოლებთან უფრო მეგობრულები არიან, მათთან კონფლიქტის გარეშე ამყარებენ ურთიერთობას, უფრო აქტიურები არიან და სკოლის გარემოსაც უფრო ადვილად ეჩვევიან.”
მაია ყუფარაძე ამბობს, რომ სკოლამდელი ასაკის ყველა ბავშვმა საბავშვო ბაღში მინიმუმ ერთი წლის განმავლობაში მაინც აუცილებლად უნდა იაროს. ბაღისთვის სოფელში ახალი შენობის აშენება კი ხშირად შესაძლოა, აუცილებელი სულაც არ იყოს და ამისთვის მუნიციპალიტეტმა მის საკუთრებაში არსებული რომელიმე ნაგებობის ნაწილი გამოიყენოს.
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
კომენტარები