საქართველოს საგარეო საქმეთა სამინისტროს ინფორმაციით, დიდი ბრიტანეთის ელჩმა საქართველოში მინისტრ მიხეილ ჯანელიძეს მადლობა გადაუხადა მხარდაჭერისა და სოლიდარობისთვის.

უწყებაში აღნიშნავენ, რომ მადლობა ქიმიური იარაღის გამოყენების ფაქტზე, რეაგირების მიზნით, საქართველოდან რუსი დიპლომატის გაძევებას შეეხებოდა.

"დიდი ბრიტანეთი და საქართველო, როგორც სტრატეგიული პარტნიორები, აღნიშნულ ფაქტს განიხილავენ საერთო უსაფრთხოებისთვის სერიოზულ გამოწვევას და ხაზს უსვამენ საერთაშორისო საზოგადოების კონსოლიდირებული პოზიციის აუცილებლობას", - აღნიშნულია საგარეო საქმეთა სამინისტროს მიერ გავრცელებულ განცხადებაში.

საქართველომ ქვეყნიდან რუსი დიპლომატის გაძევების გადაწყვეტილების შესახებ 29 მარტს გაავრცელა განცხადება.

ყოფილი რუსი ჯაშუში სერგეი სკრიპალი და მისი შვილი იულია, ბრიტანეთის ქალაქ სოლსბერიში 4 მარტს ნერვო-პარალეპტიკური ნივთიერებით მოწამლეს. ისინი ამ დრომდე მძიმე მდგომარეობით საავადმყოფოში არიან. ბრიტანეთის ოფიციალური პოზიციით, საქმეში რუსეთი მონაწილეობს.

ბრიტანეთის მხარდასაჭერად, საერთო ჯამში, აშშ-დან, კანადიდან და ევროპის ქვეყნებიდან 150-ზე მეტი რუსი დიპლომატი გააძევეს.