იზოლატორში საპროტესტო აქციის 14 მონაწილის მიმართ ჩადენილი დამამცირებელი და არაადამიანური მოპყრობის გამო სასამართლომ ორი ყოფილი საჯარო მოხელე დამნაშავედ ცნო.

საქართველოს მთავარი პროკურატურის ინფორმაციით, 2011 წლის მაისის თვეში, თბილისში, საზოგადოებრივ მაუწყებელთან გამართულ საპროტესტო აქციაზე პოლიტიკური პარტიების 14 აქტივისტი დააკავეს, რომლებიც შსს-ს ყვარლის პოლიციის სამმართველოს შენობაში დროებითი მოთავსების იზოლატორში გადაიყვანეს.

უწყების ინფორმაციით, დროებითი მოთავსების იზოლატორის ყოფილი უფროსი და ამავე იზოლატორის ყოფილი ინსპექტორი პატიმრობაში მყოფ 14 პირს განსხვავებული პოლიტიკური შეხედულებების გამო დამამცირებლად ექცეოდა. პროკურატურის ინფორმაციით, ბრალდებულებს ყოველდღიურად, საკნებიდან გამოჰყავდათ პატიმრები და სცემდნენ ხელ-ფეხით, ამცირებდნენ და აყენებდნენ სიტყვიერ შეურაცხყოფას, არ აძლევდნენ დღისა და ღამის საათებში დაძინებისა და დასვენების საშუალებას, აიძულებდნენ საათობით ფეხზე დგომას და ოპოზიციური პოლიტიკური პარტიის ლიდერების გინებას. პერიოდულად ხდიდნენ მაისურებს და აიძულებდნენ საკნების მორეცხვას, რის შემდეგაც დაბინძურებულ სველ მაისურებს აცმევდნენ ძალით.

თბილისის საქალაქო სასამართლოს გადაწყვეტილებით, ბრალდებულებს საქართველოს სსკ-ის 1443-ე მუხლის მეორე ნაწილის "ა". "ბ", "დ", "ვ" და "ზ" ქვეპუნქტებით გათვალისწინებული დანაშაულის ჩადენისთვის განესაზღვრათ 4 წლით თავისუფლების აღკვეთა, თუმცა ამნისტიის შესახებ საქართველოს კანონის გამოყენებით მათ სასჯელი შეუმცირდათ და განესაზღვრათ 3 წლით თავისუფლების აღკვეთა. დამატებითი სასჯელის სახით კი 1 წლით და 6 თვის ვადით ჩამოერთვათ თანამდებობის დაკავების უფლება, ასევე თითოეულს დაეკისრა ჯარიმა 2000 ლარის ოდენობით.