პირადი ცხოვრების ამსახველი უკანონო კადრების შენახვა-გავრცელების ფაქტზე პროკურატურამ ორი პირი დააკავა. პროკურატურის განმარტებით, მათი დაკავება არ უკავშირდება 11 და 14 მარტს სოციალური ქსელებით პირადი ცხოვრების ამსახველი კადრების გავრცელებას. ერთ-ერთი დაკავებული კონსტიტუციური უსაფრთხოების დეპარტამენტის ყოფილი მაღალჩინოსანი, ზურაბ ჯამალაშვილია, მეორე კი, ადვოკატი ირაკლი ფხალაძე. ამჟამად, ბრალდებულები წინასწარი დაკავების იზოლატორში არიან.

კუდ-ის დეპარტამენტის ყოფილი უფროსი ზურაბ ჯამალაშვილი უკვე დაიკითხა და ბრალს არ აღიარებს. მისი ადვოკატის ვარაუდით, კუდ-ის ყოფილი მაღალჩინოსნის დაკავება, შესაძლოა, დაკავშირებული იყოს მის შვილთან, რომელიც 2012 წლის ნოემბერში კიბერდანაშაულისთვის იყო ბრალდებული.

ადვოკატის თქმით, ირაკლი ფხალაძეს ბრალი უკვე წაუყენეს, თუმცა გამოძიებას მასალები მისთვის ჯერ არ გადაუცია.

კუდ-ის ყოფილ მაღალჩინოსანს 157-ე მუხლის პირველი ნაწილით აქვს ბრალი წაყენებული, რაც პირადი ცხოვრების ამსახველი ვიდეომასალის მოპოვება-გავრცელებას გულისხმობს. პროკურატურის განცხადებით, ბრალდებულთა დაკავებისა და საქმის გარემოებებთან დაკავშირებით საქართველოს პროკურატურა უახლოეს ხანში დეტალურ ინფორმაციას მიაწვდის საზოგადოებას. ამ ეტაპზე მიმდინარეობს საგამოძიებო და საპროცესო მოქმედებები.