დმანისის გადარჩენის ფონდმა, სადაც ოპოზიციური პარტიების ნაწილი გაწევრიანდა, აუქციონზე 300-წლიანი ევკალიპტის ხე 20 020 ლარად იყიდა. ისინი ამბობენ, რომ ხის შეძენა საქართველოს ყოფილ პრემიერსა და ქართული ოცნების დამფუძნებელს, ბიძინა ივანიშვილს სურს და ამიტომ იყიდება.

პარტია ახალი საქართველოს ლიდერმა გიორგი ვაშაძემ On.ge-ს უთხრა, რომ მათ უკვე გახსნეს ანგარიში, სადაც თითოეულ ადამიანს შეუძლია თანხის ჩარიცხვა. ის ამბობს, რომ იუსტიციის სამინისტრომ მათი ფონდი ჯერ კიდევ არ დაარეგისტრირა:

"ჩვენი შუამდგომლობაა ეს ხე დარჩეს იქ სადაც არის".

გიორგი ვაშაძის თქმით, სადაც იქნება პირდაპირი პოლიტიკური ინტერესი და სადაც ყოფილი პრემიერის ბიძინა ივანიშვილის "კვალს დაინახავენ", მსგავსი პრინციპით ჩაერთვებიან პროცესში.

აუქციონის პირობების თანახმად, ხის სიმაღლე საორიენტაციოდ - 26-27 მეტრია, შტამბის გარშემოწერილობა ფესვის ყელიდან - 10 სმ. სიმაღლეზე - 10,1 მეტრი, შტამბის სიმაღლე - 3,4 მეტრი. აღენიშნება სხვადასხვა სახის დაზიანებები.

ერთიანი ნაციონალური მოძრაობის წევრის, ნიკა მელიას თქმით, ხე აჭარაში, მწვანე კონცხზეა და მისი საწყისი ღირებულება 7 ათასი ლარია.