კანის კინოფესტივალის დირექტორმა, ტიერი ფრემომ, რამდენიმე დღის წინ თქვა, რომ თანამედროვე ეპოქის გამოწვევებისთვის ფეხის აწყობას არ აპირებს და ამიტომ, წლევანდელ საკონკურსო პროგრამაში ნეტფლიქსისა თუ ამაზონის არც ერთი ფილმი არ იქნება.

ასევე, კიდევ ერთხელ გაავრცელა განცხადება და მოუწოდა ვარსკვლავებს წითელ ხალიჩაზე სელფი არ გადაიღონ, თუმცა, ისევე როგორც გასულ წლებში, სავარაუდოდ, არც ახლა დაუჯერებენ ვარსკვლავები ფრემოს და კინოპრემიერის დროს აუცილებლად გადაიღებენ სელფს.

ტიერი ფრემომ აღიარა ისიც, რომ წლების განმავლობაში დიდი ინტერესი და ყურადღება ქალთა უფლებებისა და თანასწორობის თემასთან დაკავშირებით არ გამოუჩენია და მხოლოდ გასულ წელს, ჟიურის ერთ-ერთმა წევრმა, ჯესიკა ჩესტეინმა გაარკვია ამ თემაში.

"ჯესიკა ჩესტეინი, რომელიც გასულ წელს კანის ჟიურის წევრი იყო დამეხმარა გავრკვეულიყავი ქალთა უფლებების საკითხებში. მან ამიხსნა რატომ არის მნიშვნელოვანი და აუცილებელიც კი, რომ ფილმების შერჩევის დროს ყურადღება მიგვექცია ქალი რეჟისორების, მათი ხედვისა თუ გამოცდილებებისთვის. იმდენად საინტერესოდ ახსნა და განმიმარტა ყველაფერი, რომ ახლა ერთადერთი რის იმედსაც ვიტოვებ არის ის, რომ წლევანდელ ფესტივალზე უფრო მეტი ქალის ისტორიას ვნახავთ, უფრო მეტი ქალი სცენარისტისა და რეჟისორის ამბავს მოვისმენთ და მათი პერსპექტივით დავინახავთ სამყაროს, რადგან მათ ნამდვილად აქვთ საკუთარი და განსხვავებული შეხედულებები. ჯესიკა მესაუბრა გენდერული ნიშნით განსხვავებულ ხეფასებზეც და ახლა მეც, ისევე როგორც ყველამ, ჩვენი ხმა უნდა მივამატოთ იმ ადამიანების ხმას, ვინც თანაბარ ანაზღაურებას ითხოვს, მით უმეტეს, რომ სამყარო უკვე აღარ არის ისეთი, როგორც ვაინშტაინის ამბის გავრცელებამდე იყო, სამყარომ გაიღვიძა და ეს ყველაფერი მხოლოდ კეთილდღეობისთვის უნდა გამოვიყენოთ. სამწუხაროდ, ერთადერთი ქალი ვინც კანის ფესტივალზე გაიმარჯვა ჯეინ კემპიონი იყო, ახლა კი დიდი სურვილი და იმედი მაქვს, რომ სხვა ქალი რეჟისორებიც მიიღებენ ოქროს პალმის რტოს", - ამბობს ტიერი ფრემო.

კანის კინოფესტივალი წელს 8 მაისს დაიწყება.