ცნობილი ამერიკელი პოპ-მომღერალი კრისტინა აგილერა შავი ზღვის არენაზე იმღერებს, ამის შესახებ დღეს გამართულ ბრიფინგზე გახდა ცნობილი.

მომღერალი Black Sea Arena-ს გახსნაზე ქართუ ჯგუფს ჩამოჰყავს.

ამერიკელი პოპ-ვარსკვლავი გურიაში მდებარე არენას 30 ივლისს ეწვევა, კონცერტზე 9,500 მსმენელი შეძლებს დასწრებას.

გუშინ, 10 ივლისს, გიორგი კვირიკაშვილმა განაცხადა, რომ ამ სეზონზე ფონდი ქართუ Black Sea Arena-ზე მსოფლიო ვარსკვლავების კონცერტების სერიას ჩაატარებს.

ფოტო: თორნიკე მანდარია / On.ge

ფონდმა ქართუმ 200 მილიონი ლარის ღირებულების საკონცერტო დარბაზი სახელმწიფოს გუშინ გადასცა. აღნიშნული საკონცერტო დარბაზის მშენებლობა ცოტა ხნის წინ დასრულდა და ის 10 ათასამდე პირს იტევს.

ბილეთების გაყიდვა tkt.ge-ზე 12 ივლისს, დილის 9 საათზე დაიწყება. ბილეთების ფასები 50, 70, 80, 90 და 100 ლარი იქნება. მსმენელები 100 ლარად 2,700 ადგილიან გოლდენ რიგში შეიძენენ ბილეთებს. ამას გარდა იქნება 600 ლარიანი VIP ადგილები. ბილეთის ფასები სივრცეების მიხედვით იქნება განაწილებული. ბილეთები ქართველ და უცხოელ მსმენელს თანაბრად დაეთმობათ.

კონცერტის ორგანიზატორების თქმით, Black Sea Arena-ზე ამ ზაფხულს უკვე 6 ღონისძიებაა დაგეგმილი, თუმცა ეს რიცხვი შესაძლოა გაიზარდოს. მათ შორის იქნება სპორტული ღონისძიებებიც.