ფეხბურთთან დაკავშირებული ისტორიები ძირითადად საფეხბურთო მოედანს არ სცილდება. იმარჯვებენ აუტსაიდერები, გუნდებს ბოლო წამებზე გააქვთ გოლი და მაყურებლები დაუჯერებელი დრამის მონაწილენი ხდებიან. თუმცა, ერთ-ერთი ყველაზე დამაინტრიგებელი და ლამის მისტიკით მოცული საფეხბურთო ისტორია სწორედ მოედნის მიღმა მოხდა.

1966 წლის 20 მარტს მსოფლიოს საფეხბურთო ჩემპიონატის თასი მოიპარეს. ამ ამბავმა მსოფლიოს პრესაში დიდი მითქმა-მოთქმა გამოიწვია. პანიკამ მოიცვა ინგლისის საფეხბურთო ასოციაცია (რომელსაც მოსამზადებელი პროცესისთვის ორგანიზება უნდა გაეწია) და ლონდონის პოლიცია. პანიკამ გასტანა მანამ, სანამ თასი ძაღლმა პიკლსმა და მისმა პატრონმა, დევიდ კორბეტმა არ იპოვეს.

როგორც კორბეტი ამბობს, ეს არის ისტორია, რომელიც ფეხბურთის ლეგენდად იქცა:

მართალია, ისტორიის მთავარი მონაწილე, როგორც უკვე გითხარით, ძაღლია, რომელიც საფეხბურთო ფოლკლორის ნაწილად იქცა, თუმცა ყველაფერი უფრო ადრე დაიწყო.

ძარცვა

მსოფლიოს ჩემპიონატის დაწყებამდე 6 თვით ადრე ინგლისის საფეხბურთო ასოციაციამ მიიღო მითითება, რომ თასი ვესტმინისტერის ცენტრალურ დარბაზში, პარლამენტისგან ასეულ მეტრში, კარგად დაცულ ადგილას განეთავსებინათ. ფიფასგან იყო მოთხოვნა, რომ თასის ტრანსპორტირება სანდო კომპანიას მოეხდინა, იგი შეენახათ მინის ყუთში, რომელსაც 24 საათის განმავლობაში დაიცავდნენ და 30.000 ფუნტად დაეზღვიათ. საინტერესოა, რომ თავად თასი დაახლოებით 3 მილიონი ფუნტის ღირებულების იყო.

როგორც აღმოჩნდა, დაცვა 24-საათიან რეჟიმში არ მუშაობდა და გამოფენის დახურვისას, დაახლოებით დილის 11:00-დან 12:10-მდე ინტერვალში, როდესაც ქვემოთა სართულზე საეკლესიო მსახურება მიმდინარეობდა, მძარცველი უკანა კარიდან შეიპარა, თასი აიღო და შენობა კვალის გარეშე დატოვა. ლონდონის პოლიცია თვალსა და ხელს შუა გაქურდეს.

ამის შემდეგ ერთ-ერთი თანამშრომელი ამბობდა, რომ "დაცვას არანაირი შეცდომა არ დაუშვია, თასი უბრალოდ გაქრა".

პოლიციის თქმით, მძარცველი 30 წლამდე მამაკაცი იყო, შავი თმითა და სახეზე ნაიარევით.

ისტორიის მთავარი გმირები

დავუბრუნდეთ პიკლსსა და კორბეტს. ძარცვიდან ერთი კვირის შემდეგ კორბეტი თავის ძაღლთან ერთად სატელეფონო ჯიხურის სიახლოვეს იდგა და ცდილობდა გაერკვია, შეეძინა თუ არა მის ძმას შვილი. უეცრად ძაღლმა რაღაც იყნოსა და უცნაურად შეფუთული ნივთი იპოვა.

"ნივთი გაზეთში იყო შეხვეული და ჩემი მეზობლის მანქანის საბურავთან იდო. ხელში ავიღე და ძალიან მძიმე აღმოჩნდა, მიუხედავად იმისა, რომ არც თუ ისე დიდი იყო".

მან ერთ მომენტში ისიც კი ჩათვალა, რომ სინამდვილეში ბომბი ეჭირა:

კორბეტის მეუღლე მაინცდამაინც არ მოიხიბლა და ისიც კი თქვა, ეს თასი არ მომეწონაო. ასეა თუ ისე, კორბეტმა მაინც ჩააბარა თასი და, თუმცა, მისთვისვე მოულოდნელად, ნომერ პირველ ეჭვმიტანილად იქცა.

რამდენიმესაათიანი დაკითხვისა და რამდენიმეკვირიანი ეჭვმიტანილობის შემდეგ, კორბეტის მიმართ კითხვის ნიშნები გაქრა. ცოლ-ქმარს სატელევიზიო შოუებშიც ეპატიჟებოდნენ, პიკლსს კი მედალი და არაერთი ჯილდო გადასცეს.

1966 წლის მსოფლიოს საფეხბურთო ჩემპიონატი ინგლისის ნაკრებმა მოიგო.

შემდგომი ცხოვრება

პიკლსი 1967 წელს მოკვდა. იმ დროს, როცა კატას მისდევდა, თოკით ხის ტოტს გამოედო და დაიხრჩო.

ლეგენდარული ძაღლი კორბეტის ეზოში დამარხეს, კორბეტი კი ცოცხალია და ამავე ადგილას ცხოვრობს.

როდესაც ლონდონის მოქალაქე უყურებს ინგლისელთა ლეგენდარული კაპიტნის ბობი მურის ფოტოს, რომელსაც ხელში თასი უჭირავს, კორბეტმა იცის, რომ ამაში მისი წვლილიც დიდია.

"ამის ნახვისას სიამაყით ვივსები და ის განცდაც კი მიჩნდება, რომ თასი მეც უნდა ამეწია".