თბილისის მერიის ინფორმაციით, კოჯორი-ბეთანიის გზის სარეაბილიტაციო სამუშაოების დროს, ბეტონით ჩამოსხმული ბიუსტი აღმოაჩინეს.

ჯერჯერობით უცნობია, თუ ვისია ბიუსტი, თუმცა თბილისის მერია ვარაუდობს, რომ ის მეცხრამეტე საუკუნის ცნობილ ქართველ მწერალს, გრიგოლ ორბელიანს, ეკუთვნის:

"ჯერ კიდევ მიდის კვლევა, მაგრამ შესაძლოა ეს იყოს გრიგოლ ორბელიანი, ეს ვარაუდი ემყარება ბიუსტის ჩაცმულობას. ასევე, იმას, რომ ადრე, როდესაც გრ. ორბელიანის ბიუსტი ჩამოაგდეს, ამბობდნენ, რომ მას ცხვირი დაუზიანდაო. ეს დეტალები იძლევა ამ ვარაუდის საშუალებას. კვლევა გრძელდება და შეიძლება არ დადასტურდეს, ან დადასტურდეს ეს ვარაუდი. დანამდვილებით, თუ ვის ეკუთვნის ბიუსტი, მომავალში გახდება ცნობილი" - განუცხადეს On.ge-ს თბილისის მერიის პრესსამსახურში.

ბიუსტი კიკეთი-კოჯრის საუბნო სამსახურის შენობაშია გადატანილი.