აჭარის უმაღლესმა საბჭომ საზოგადოებრივი მაუწყებლის სამეურვეო საბჭოს წევრობის კანდიდატები დაიბარა და გასაუბრებას უტარებს. შეტყობინება მიიღო ყველა კანდიდატმა, თუმცა უარი ერთმა - ზაზა შათირიშვილმა თქვა. უმაღლეს საბჭოში On.ge-ს უთხრეს, რომ შათირიშვილმა გასაუბრებაზე უარის თქმა მოუცლელობით ახსნა.

აჭარის უმაღლეს საბჭოში ქართული ოცნების დეპუტატი ნინო ჩხეტია On.ge-სთან საუბრისას ამბობს, რომ სამეურვეო საბჭოს წევრობის კანდიდატებს კონცეფციებში აჭარის მაუწყებელზე ნაკლებად ჰქონდათ ყურადღება გამახვილებული. ამ მიზეზით გადაწყვიტეს კანდიდატებთან შეხვედრა და საზოგადოებრივი მაუწყებლის აჭარის ტელევიზიასა და რადიოს შესახებ კითხვების დასმა. ის ამბობს, რომ დაინტერესდნენ იმითაც, როგორ წარმოუდგენიათ აჭარის ტელევიზიისა და რადიოს მხარდაჭერა და განვითარება.

"აჭარის ტელევიზიისა და რადიოს მრჩეველთა საბჭოს მხრიდან იყო მცდელობები, რომ დაფინანსება გაზრდილიყო. კანდიდატის წარდგენისას ჩვენი მხრიდან იქნება ერთგვარი თხოვნა, რომ წლების განმავლობაში როცა იქნება მეურვე გარკვეული ლობისტობა გაუწიოს ამ საკითხს", - აღნიშნა უმაღლესი საბჭოს დეპუტატმა.

დეპუტატი განმარტავს, რომ აჭარის ტელევიზიისა და რადიოს დირექტორი და მრჩეველთა საბჭოს თქმით, საზოგადოებრივი მაუწყებლის სამეურვეო საბჭოში აჭარისგან დასახელებული გიორგი კოხრეიძე არ იჩენდა ინტერესს პრობლემების მოსაგვარებლად.

საზოგადოებრივი მაუწყებლის სამეურვეო საბჭოში სულ ოთხი ვაკანტური თანამდებობაა, მათგან ერთ-ერთს პარლამენტს დასამტკიცებლად აჭარის უმაღლესი საბჭოს წარუდგენს.

ამავე თემაზე: