საზოგადოებრივი მაუწყებლის აღმასრულებელი დირექტორი, ვასილ მაღლაფერიძე ბორდის წევრობის კანდიდატების შეფასებისას ამბობს, რომ ზაზა შათირიშვილი ღირსეული კანდიდატი იქნება და მეგობრობა ხელს არ შეუძლია:

"მინდა გითხრათ და გაითვალისწინოთ, რომ მეგობრობა, რასაც თქვენ გულისხმობთ, ადამიანებს ხელს არ უშლის. ადამიანებს ხელს უშლის, როდესაც არც მეგობრობის გაგება აქვთ სიღრმისეულად და არც ზოგადად, განათლება არა აქვთ და არც ცოდნა არა აქვთ და შეუძლიათ, ყველა სისულელეზე შემდეგ კითხვებით გააგრძელონ".

მაღლაფერიძე ამბობს, რომ საქართველოში, სადაც 3 მილიონი ადამიანი ცხოვრობს, ნახევარი ერთმანეთს იცნობს და ნახევარი ერთმანეთის მეგობარია:

"მე ძალიან ბევრი მეგობარი მყავს და ჩემი მეგობრობა მხოლოდ შეეწევათ მათ და დარწმუნებული ვარ, მეც შემეწევა მათი მეგობრობა. თქვენ რა გინდათ მითხრათ, რომ ზაზა შათირიშვილის მთელი მისი საქმიანობა არის, რომ ჩემი მეგობარია? მე შემიძლია ჩამოგითვალოთ, შეიძლება კიდევ არიან ჩემი მეგობრები, მათ შორის, ამ კომისიაში. მერე? რა იცვლება ამით? ან ვიღაცის მეგობარია, მერე რა? ჩვენ შევდივართ ამის განხილვაში?"

ზაზა შათირიშვილი საზოგადოებრივი მაუწყებლის სამეურვეო საბჭოს წევრობის კანდიდატია. მას საკონკურსო კომისიასთან გასაუბრება დღეს, 13 მარტს ჰქონდა.