სოჭის ოლიმპიური თამაშების გახსნის ცერემონიამდე რამდენიმე საათით ადრე, რუსეთის პრეზიდენტმა, ვლადიმერ პუტინმა იმ სამგზავრო თვითმფრინავის ჩამოგდების ბრძანება გასცა, რომელიც, რუსული კონტრდაზვერვის ინფორმაციით, ტერორისტებს ჰყავდათ გატაცებული და თვითმფრინავის სოჭის აერპოროტში დასმას ითხოვდნენ.

ბრძანების გაცემიდან რამდენიმე წუთში გაირკვა, რომ დაზვერვის ინფორმაცია სიმართლეს არ შეესაბამებოდა და განგაში ერთ-ერთი მთვრალი მგზავრის "ხუმრობამ" გამოიწვია. აღნიშნული შემთხვევის შესახებ რუსეთის პრეზიდენტმა, ჟურნალისტ ანდრეი კონდრაშოვის დოკუმენტურ ფილმში "პუტინი" ისაუბრა.

საუბარი იყო Pegasus Airlines-ის კუთვნილ ბოინგ 737-ზე, რომელიც ხარკოვი-სტამბულის რეისს ასრულებდა. იმ მომენტისთვის თვითმფრინავის ბორტზე 110 ადამიანი იმყოფებოდა.

"გახსნის ცერემონიამდე მსოფლიო ოლიმპიური კომიტეტის წევრებთან გამართული შეხვედრის შემდეგ, ჩვენ ერთ-ერთი ოლიმპიური ობიექტისკენ ავტობუსით მივდიოდით, სწორედ ამ დროს ჩემმა ადიუტანტმა მომაწოდა ტელეფონი. ხაზზე ოლიმპიური თამაშების უსაფრთხოების შტაბის აგენტი იყო. მე მითხრეს, რომ ტერორისტებს ჰყავდათ გატაცებული თვითმფრინავი და მათ ჰქონდათ ბომბი. ლაინერი უკრაინიდან თურქეთში მიფრინავდა, ხოლო ტერორისტები თვითმფრინავის სოჭში დასმას ითხოვდნენ. უსაფრთხოების სამსახურის კითხვაზე, თუ რა უნდა ემოქმედათ, მე ვუპასუხე, იმოქმედეთ ასეთი შემთხვევებისთვის წინასწარ დასახული გეგმით - ჩამოაგდეთ თვითმფრინავი".

პუტინის თქმით, ბრძანების გაცემიდან შვიდ წუთში, მას მეორედ დაუკავშირდნენ და უთხრეს, რომ მათ არასწორი ინფორმაცია ჰქონდათ და რეალურად თვითმფრინავში ტერორისტები არ იმყოფებოდნენ. განგაში ერთ-ერთი მთვრალი მგზავრის ქცევამ გამოიწვია.

ჟურანილისტის კითხვაზე, თუ რას გრძნობდა ის იმ მონაკვეთში, სანამ სიმართლე გაირკვეოდა, პუტინი პასუხობს "უმჯობესი იქნება თუ ამაზე არ ვისაუბრებთ".