შინაგან საქმეთა სამინისტროს ინფორმაციით, ბოლო ერთი კვირის განმავლობაში ბათუმში მომხდარ 8 საქმეზე ქურდობის ბრალდებით 2 პირი დააკავეს. უწყების განცხადებით, ქურდობის 7 საქმე გახსნეს, ხოლო 1 კი აღკვეთეს.

უწყებაში ამბობენ, რომ ბრალდებულებმა ბათუმში მოქალაქეების კუთვნილი ავტომანქანებიდან 2 მაგნიტოფონი, 2 ტელევიზორი, ვიდეორეგისტრატორი, სხვადასხვა პირადი ნივთები და პლასტიკური ბარათები მოიპარეს, ასევე, მართლსაწინააღმდეგოდ დაეუფლნენ ერთ-ერთ საცხოვრებელ სახლზე დამონტაჟებულ 2 გარე ვიდეოსათვალთვალო კამერას. ერთ-ერთმა დაკავებულმა ბათუმში, მოქალაქის საცხოვრებელი სახლის პირველი სართულის აივნიდან ველოსიპედი მოიპარა, მას, ასევე, ბრალი ედება მოქალაქის კუთვნილი ლეპტოპის ქურდობაში.
სამინსტროს განცხადებით, მეორე ბრალდებული სამართალდამცველებმა იმ დროს დააკავეს, როდესაც იგი მოქალაქის საცხოვრებელი სახლის დამხმარე სათავსოდან ველოსიპედის მოპარვას ცდილობდა.

უწყებაში ამბობენ, რომ ნივთმტკიცების სახით ამოიღებულია ნაქურდალი ნივთები. საქმეზე გამოძიება ქურდობის და ქურდობის მცდელობის ფაქტებზე მიმდინარეობს.