ბრიტანელ-ნიგერიელმა მუსიკოსმა შადეიმ 7-წლიანი პაუზის შემდეგ ახალი სიმღერა დაწერა. სიმღერა 2018 წლის ფენტეზის ჟანრის ფილმისთვის, A Wrinkle in Time-სთვისაა ჩაწერილი.

სიმღერას Flower of the Universe ჰქვია და ის დღეს, 6 მარტს, გამოვიდა.

"შადეი ძალიან გულუხვია, ნამდვილი ქალღმერთი. ჩვენი ერთობლივი "მოგზაურობა", მუშაობის პროცესში, დაუვიწყარი იყო. ამაყი ვარ ვთქვა, რომ შადეიმ ჩვენი ფილმისთვის სიმღერა დაწერა და ეს უბრალოდ ახდენილი ოცნებაა" - დაწერა ფილმის რეჟისორმა, ავა დიუვერნიმ, ტვიტერზე, როდესაც სიმღერის გამოსვლა დააანონსა.

ფილმი 9 მარტს გამოდის. მასში მონაწილეობენ ოპრა უინფრი, რიზ უიზერსპუნი და სხვები. საუნდტრეკების ავტორებში, სხვა მუსიკოსებს შორის არიან დემი ლოვატო და Sia. შადეის ბოლოს სტუდიური ალბომი Soldier of Love 2010 წელს გამოვიდა.