საქართველოს პრემიერ-მინისტრის გიორგი კვირიკაშვილის განცხადებით, ქალთა მიმართ და ოჯახში ძალადობის აღკვეთის მიზნით, შემაკავებელი ორდერის გამოწერა, ასევე, იარაღთან წვდომის შეზღუდვა მარტივდება.

შესაბამის საკანონმდებლო ცვლილებებს მთავრობის დღევანდელ სხდომაზე იუსტიციის მინისტრი თეა წულუკიანი წარადგენს.

"ძალიან მნიშვნელოვანი ცვლილებაა ქალთა მიმართ და ოჯახში ძალადობის მიმართულებით რეგულაციის გამკაცრება. სამწუხაროდ, ჩვენს ქვეყანაში ამ მიმართულებით საკმაოდ არასახარბიელო სტატისტიკაა. ამაზე ჩვენ ბევრჯერ ვისაუბრეთ. მეც მქონდა საუბარი არაერთხელ და ერთ-ერთი ნაბიჯი ამ მიმართლებით შემაკავებელი ორდერის გამოწერისა და ასევე, იარაღთან წვდომის შეზღუდვის გამარტივებაა. დღემდე ეს ნაბიჯი დისკრეციული იყო და ჩვენ ვაკონკრეტებთ შემთხვევებს, როდესაც სავალდებულო იქნება შემაკავებელი ორდენის გაცემა და ასევე, იარაღთან წვდომის შეზღუდვა", – განაცხადა პრემიერმა.

გიორგი კვირიკაშვილის თქმით, ეს ნაბიჯები საკმარისი არ არის და მთავრობა სხვა ღონისძიებების განხორციელებას გეგმავს, მათ შორისაა საგანმანათლებლო კამპანიები.