დიდი ბრიტანეთის გაერთიანებული სამეფოს პრემიერმინისტრის პოსტისთვის დასაკავებლად სექტემბერში დაგეგმილ არჩევნებში მონაწილეობას ორი ქალი მიიღებს – ტერეზა მეი და ანდრეა ლიდსომი. ბრიტანეთის კონსერვატიული პარტიის წევრებმა პარტიის ლიდერის პოსტზე სწორედ მათ უნდა უყარონ კენჭი, გამარჯვებული კი დაიკავებს პრემიერმინისტრის პოსტს.

არჩეული კანდიდატი იქნება მეორე ქალი პრემიერმინისტრი ბრიტანეთის ისტორიაში მარგარეტ ტეტჩერის შემდეგ, რომელსაც აღნიშნული პოსტი 1979–1990 წლებში ეკავა.

პრემიერმინისტრის პოსტი მას შემდეგ გახდა ვაკანტური, რაც მოქმედმა პრემიერმა, დევიდ კემერონმა განაცხადა გადადგომის შესახებ. ის ბრიტანეთის ევროკავშირში დარჩენის მომხრე იყო, რამდენიმე კვირის წინ ჩატარებულ რეფერენდუმში კი ამომრჩეველთა უმრავლესობამ ევროკავშირის დატოვება აირჩია. კემერონმა განაცხადა, რომ ქვეყანა ახალი მიმართულებით ახალმა პრემიერმა უნდა წაიყვანოს.

ანდრეა ლიდსომი ბრიტანეთის კონსერვატიული პარტიის წევრია, მას ამჟამად ენერგეტიკის მინისტრის პოსტი უჭირავს. რაც შეეხება მეორე კანდიდატს, ტერეზა მეის, ის ქვეყნის შინაგან საქმეთა მინისტრია, ასევე კონსერვატორი.

ორივე კანდიდატი მხარს უჭერს დიდი ბრიტანეთის ევროკავშირიდან გასვლას. ისინი აცხადებენ, რომ ყველაფერს გააკეთებენ, რათა ბრიტანეთში მეორე რეფერენდუმი არ ჩატარდეს და ბრიტანეთი ევროკავშირში არ დაბრუნდეს.