საქართველოს პრეზიდენტი, გიორგი მარგველაშვილი მიმართავს პოლიტიკურ პარტიებს, დაიწყოს დიალოგი მართლმსაჯულების მესამე ტალღასთან დაკავშირებით და ამბობს, რომ პარლამენტის რიგგარეშე სესიის თარიღთან დაკავშირებით კონსულტაციების გამართვისთვისაც მზადაა. ამის შესახებ ჟურნალისტებს დღეს პრეზიდენტის საპარლამენტო მდივანმა, ანა დოლიძემ უთხრა.

დოლიძის თქმით, პრეზიდენტის დავალებით, ის მზადაა დაინტერესებულ ფრაქციებთან კონსულტაციები ხვალიდანვე აწარმოოს. მისი თქმით, პრეზიდენტს არაერთხელ განუცხადებია, რომ საქართველოს სასამართლო ხელისუფლებას სჭირდება ტრანსფორმაცია, ანუ ძირეული, მყისიერი და ფართომასშტაბიანი რეფორმა:

„ამჟამად, იუსტიციის საბჭოში მიმდინარეობს მოსამართლეთა შესარჩევი კონკურსი, რომლის შედეგად უნდა დაინიშნოს დაახლოებით, 65 მოსამართლე. სამოქალაქო საზოგადოების ნაწილში არსებობს მოსაზრება, რომ ეს კონკურსი ჩატარდა გაუმჭვირვალედ, დარღვევებით და მასში მონაწილეობდა რამდენიმე კანდიდატი, რომელთა პროფესიული ბიოგრაფია კითხვის ნიშნებს აჩენს საზოგადოებაში".

დოლიძის თქმით, სწორედ ზემოაღნიშნულის გათვალისწინებით, არსებობს საშიშროება, რომ ამ გასაუბრების შედეგად სასამართლო დაკომპლექტდეს მოსამართლის მანტიასთან შეუსაბამო კანდიდატებით, რაც კიდევ ერთხელ ასუსტებს სასამართლოსადმი საზოგადოების ნდობას:

"ჩვენი აზრით, ამ მძიმე შედეგის გარკვეულწილად, თავიდან ასაცილებლად და დაზღვევისათვის, შეიძლება, რომ პარლამენტმა მესამე მოსმენით მიიღოს სასამართლო რეფორმის ე.წ. მესამე ტალღა, რომელიც 27 აპრილის შემდეგ გაუგებარი მიზეზითაა გაჩერებული და რომლის მიღებაც ვერ მოხერხდა ამ თარიღის შემდეგ".

მართლმსაჯულების მესამე ტალღის კანონპროექტის ავტორი, რომელიც რამდენიმე მნიშვნელოვან საკითხთან ერთად სწორედ მოსამართლეების დანიშვნის წესს ითვალისწინებს, იუსტიციის სამინისტროა.