მოქალაქე ნოდარ ნოზაძე ეროვნული კინოცენტრის მიერ სრულმეტრაჟიანი მხატვრული ფილმის დაფინანსებისთვის გამოცხადებულ კონკურსში მონაწილე ფილმის - არმატურის სცენარის შეფასების შედეგებს აქვეყნებს, რომელშიც ჟიურის წევრის მიერ პროექტი შეურაცხმყოფელი სიტყვებით არის შეფასებული:

"სცენარის კითხვისას ხან ვარწ-ევდი, ხან ვი-ვავდი. დარწმუნებული ვარ, ავტორი კმაყოფილი იქნება იმ ემოციებით, რაც სცენარმა ჩემში გამოიწვია".

თავად ნოზაძე თავის Facebook გვერდზე წერს:

"დღეს ცხოვრებაში პირველად გამოვითხოვეთ კინოცენტრიდან შეფასებები, მოლოდინმა ყველაფერს გადააჭარბა, ასე აფასებენ მონაწილეებს კინოცენტრის ჟიური".

აღნიშულ ჟიურიში ვაჟა გიგაშვილი, რამაზ ხოტივარი, ეთერ ოკუჯავა, ირაკლი ფანიაშვილი, თამარ ფოცხიშვილი, რუსუდან პირველი და ირაკლი სოლომანაშვილი შედიოდნენ.

მოგვიანებით ეროვნული კინოცენტრი ჟიურის ერთ-ერთი წევრის მიერ არმატურის შეფასებისას გაკეთებულ წერილობით კომენტარს გამოეხმაურა და ბოდიში მოუხადა კონკურსის მონაწილეებს იმის გამო, რომ ჟიურის წევრის არაეთიკური ჩანაწერი სათანადოდ არ გაკონტროლდა და მოხვდა მიღებულ საბუთებში:

"ეროვნულ კინოცენტრს კანონით არ აქვს უფლება გაასაჯაროვოს ჟიურის ამ წევრის ვინაობა, თუმცა კინოცენტრი იმედს იტოვებს, რომ ის თავად მოუხდის ბოდიშს ამ შეფასების გამო პირველ რიგში პროექტის ავტორებს და შემდეგ მთელ კინოსაზოგადოებას. კინოცენტრი მიიჩნევს, რომ ჟიურის წევრები განსაკუთრებული პატივისცემით უნდა მიუდგნენ პროექტების ავტორებს, არსებობს ასევე ჩვენ მიერ შემუშავებული ეთიკის ნორმები, რომელსაც კონკურსამდე ხელს აწერს საექსპერტო კომისიის ყველა წევრი".

ეროვნული კინოცენტრის მიერ 2016-2017 წელს სრულმეტრაჟიანი მხატვრული ფილმის წარმოების დასაფინანსებლად გამოცხადებულ კონკურსში 17 პროექტი იყო წარმოდგენილი, საიდანაც მხოლოდ 2 პროექტი - ნამე და ჰორიზონტი დაფინანსდა. დაფინანსებულ ფილმებს შორის ვერ მოხვდა არმატურა, რომლის დირექტორი თავად ნოდარ ნოზაძეა. ფილმის რეჟისორი - გიორგი ცქვიტინიძე, ხოლო პროდიუსერი შპს პანსიონატია.