ნეონაცისტური ორგანიზაცია ქართული მარშის ე.წ. სახალხო პატრულის მიერ საპოლიციო საქმიანობის მცდელობა უხეშ კანონდარღვევად შეფასდება და მკაცრი რეაგირება მოჰყვება. ამის შესახებ შინაგან საქმეთა სამინისტრომ On.ge-ს განუცხადა:

"ქვეყანაში მართლწესრიგის დაცვა და დანაშაულის აღკვეთა კანონის საფუძველზე შექმნილი სამართალდამცავი ორგანოების პრეროგატივაა. შესაბამისად კანონით, მხოლოდ აღნიშნულ ორგანოებს აქვთ დამნაშავეთა მიმართ ლეგიტიმური ძალის გამოყენების უფლებამოსილება."

ქართული მარშის მიერ ე.წ. სახალხო პატრულის შექმნასთან დაკავშირებით On.ge-მ ინფორმაცია 6 თებერვალს გაავრცელა. "სახალხო პატრული" აპირებს გააკონტროლოს თბილისში მდებარე ქუჩები - აღმაშენებლის გამზირი და კოტე აფხაზის ქუჩა. აღნიშნულთან დაკავშირებით On.ge-მ მაშინვე სცადა შინაგან საქმეთა სამინისტროსგან კომენტარის მიღება, თუმცა პასუხი მხოლოდ დღეს, 16 თებერვალს მიიღო.

ქართული მარში ქსენოფობიური და ჰომოფობიური განწყობების მატარებელი ადამიანების გაერთიანებაა, რომელიც თბილისსა და საქართველოს სხვა ქალაქებში აქციებს მართავენ. ისინი სხვადასხვა დროს დაკავებულნი იყვნენ ტელეკომპანია რუსთავი 2-ის შენობისთვის ქათმების სროლით, ასევე, ლგბტ დროშის დაწვითა და დახევით.