სახელმწიფო აუდიტის სამსახურში რიმა ბერაძე ამომრჩევლის სავარაუდო მოსყიდვის ფაქტთან დაკავშირებით გამოკითხვაზე დაიბარეს.

ორგანიზაციამ სამართლიანი არჩევნები ქართული ოცნების მიერ ამომრჩევლის სავარაუდო მოსყიდვის ფაქტზე, განცხადებით აუდიტის სამსახურს, წინასაარჩევნო აგიტაციაში უკანონოდ მონაწილეობის ფაქტის მოკვლევის მოთხოვნით კი ცენტრალურ საარჩევნო კომისიას განცხადებით მიმართა.

პოლიტიკური პარტიების ფინანსური საქმიანობის მონიტორინგის სამსახურის უფროსმა ზურაბ აზნაურაშვილმა, On.ge-ს განუცხადა, რომ აუდიტის სამსახურმა რიმა ბერაძე 7 ივლისს დაიბარა. მასთან ერთად დაბარებულია საქველმოქმედო ორგანიზაციის თავმჯდომარეც:

"ჩვენ შემოსული ინფორმაციის საფუძველზე დავიწყეთ შესწავლა. მათ ვთხოვეთ, რომ ზეგ მოვიდნენ ჩვენთან და წარმოადგინონ ინფორმაცია ღონისძიების შესახებ, თუ როგორ დაიგეგმა, ვინ გაწია ხარჯი, რა ფორმით მიიღო მონაწილეობა საკრებულოს წევრმა და ა.შ. ამით უნდა მოხდეს კვალიფიკაცია, არის თუ არა დარღვევა".

სამართლიანი არჩევნების თქმით, საქმე ეხება თბილისის საკრებულოს ფრაქცია ქართული ოცნების თავმჯდომარის, რიმა ბერაძის ინიციატივას, რომლის მიხედვით, ჩუღურეთის რაიონში მდებარე საჯარო სკოლების 200 პედაგოგს უფასო სამედიცინო გამოკვლევები ორგანიზაცია ქართული ოცნება - ჯანმრთელმა მომავალმა ჩაუტარა.

ორგანიზაციის განცხადებით, აღნიშნული შეიცავს ამომრჩევლის მოსყიდვის ნიშნებს, რაც აკრძალულია მოქალაქეთა პოლიტიკური გაერთიანებების შესახებ ორგანული კანონის 252 მუხლით, რომლის თანახმადაც პარტიას თავისი კანდიდატის, წარმომადგენლის, ან სხვა პირის მეშვეობით, ასევე, ნებისმიერ პირს რომელიმე პარტიის სასარგებლოდ, ეკრძალება პირდაპირ ან არაპირდაპირ საქართველოს მოქალაქეებისათვის უსასყიდლოდ მომსახურების მიწოდება, ან გავრცელება, ან ასეთის დაპირება.