დაახლოებით 1 საათის წინ, ამერიკის შტატ ფლორიდის ქალაქ პერკლენდში, სკოლაში თავდამსხმელი შევიდა და მასწავლებლებსა და მოსწავლეებს ცეცხლი გაუხსნა. დაჭრილია მინიმუმ 14 ადამიანი და არის მსხვერპლი. ინფორმაციას BBC ავრცელებს.

პოლიციამ თავდასხმაში ბრალდებული ცოტა ხნის წინ დააპატიმრა. დაკავებული 19 წლისაა და სკოლის ყოფილი მოსწავლეა.

"ამ დროისთვის ადგილზე საერთო ჯამში 14 მსხვერპლია" - განაცხადა სკოლის წარმომადგენელმა, თუმცა არ დაუკონკრეტებია, რამდენი მათგანია დაჭრილი და რამდენი დაღუპული.

ფოტო: Reuters

ამერიკული მედია იუწყება, რომ ადგილზე 20-ზე მეტი დაჭრილია და პოლიციამ პირველ რიგში ისინი გამოიყვანა შენობიდან. დაჭრილი მოსწავლეების ნაწილს პირველადი დახმარება სკოლის გარეთ აღმოუჩინეს.

ფლორიდის სენატორმა, ბილ ნელსონმა, Fox News-თან საუბრისას განაცხადა, რომ ადგილზე "ბევრი დაღუპულია".

ამ დროისთვის პოლიციას შენობიდან მოსწავლეები და სკოლის თანამშრომლები გამოჰყავს. სკოლის გარშემო შეკრებილნი არიან მშობლები. სამართალდამცველების განცხადებით, სკოლაში, შესაძლოა, რამდენიმე მოსწავლე კვლავ იმალებოდეს. შენობის ევაკუაცია კვლავ მიმდინარეობს.

ამერიკის პრეზიდენტმა დაღუპულების ოჯახებს სამძიმარი გამოუცხადა.

"თანაგრძნობას ვუცხადებ ფლორიდის საშინელ თავდასხმაში დაღუპულების ოჯახს. არცერთი ბავში, მასწავლებელი ან ვინმე სხვა არ უნდა გრძნობდეს საფრთხეს ამერიკის სკოლაში" - დაწერა დონალდ ტრამპმა ტვიტერზე.