ვარკეთილის მეტროს საპროექტო სამუშაოების მიღება-ჩაბარება ტექნიკური ექსპერტიზის გარეშე განხორციელდა, - ამის შესახებ კალაძემ დედაქალაქის მთავრობის დღევანდელ სხდომაზე განაცხადა. მისი თქმით, რეაბილიტაციისას ტექნიკური ექსპერტიზის აუცილებლობა არსებობდა.

"ამ ეტაპზე, არსებული გარემოებები შევისწავლეთ და აშკარაა, რომ სამუშაოების შესრულების დროს ხარვეზები იყო - დაწყებული საპროექტო სამუშაოების შესყიდვებიდან, დამთავრებული სამშენებლო სამუშაოების წარმოების პროცესით. ვიცით, რომ ამ მიმართულებით დაწყებულია გამოძიება და დაველოდოთ მის შედეგებს."

აღნიშნულის გამო კალაძემ, თბილისის სატრანსპორტო კომპანიის ხელმძღვანელს მამუკა კობახიძეს დაავალა, დაკავებული პოზიციებიდან ის პირები გაათავისუფლოს, რომლებიც მეტროსადგურ ვარკეთილის რეაბილიტაციის სატენდერო პროცედურებში იყვნენ ჩართული.

ახალგარემონტებულ მეტროსადგურ ვარკეთილში ჭერი 30 იანვარს ჩამოვარდა, რის შედეგად 14 ადამიანი დაშავდა.

სადგურის განახლებაზე კომპანია შპს ყვარელრემმშენმა იმუშავა, რომელიც თბილისის მერიაში ელექტრონული ტენდერის გზით შეარჩიეს. მასთან 347 852 ლარის ხელშეკრულება 2016 წლის 30 ნოემბერს დაიდო. მეტრო ვარკეთილის სარემონტო სამუშაოები 2017 წლის სექტემბრის თვეში დაასრულა.

ამავე თემაზე: