დავით საყვარელიძის თქმით, საქართველოს მესამე პრეზიდენტი, მიხეილ სააკაშვილი უკრაინაში, რესტორანში დააკავეს. ამის შესახებ სააკშვილის თანგუნდელმა საყვარელიძემ ფეისბუქზე დაწერა.

საყვარელიძის თქმით, მიხეილ სააკაშვილი რესტორან სულგუნში დააკავეს. პოსტში მან რესტორნის მისამართი დაწერა და მომხრეებს შეკრებისკენ მოუწოდა. საყვარელიძე ავრცელებს იმ მანქანის მონაცემებსაც, რომლითაც, მისი თქმით, სააკაშვილი წაიყვანეს.

მიხეილ სააკაშვილის ოფიციალურ ფეისბუქგვერდზეც გავრცელდა განცხადება, რომ პარტია ახალი ძალების ოფისთან ახლოს ნიღბიანმა უცნობებმა აიყვანეს მიხეილ სააკაშვილი, მანქანაში ჩასვეს და გაურკვეველი მიმართულებით წაიყვანეს.

ამავე გვერდზე ვრცელდება ვიდეო, რომლის აღწერაშიც მითითებულია, რომ თვითმხილველმა მიხეილ სააკაშვილის დაკავებისას გადაიღო.

პირველად სააკაშვილი 5 დეკემბერს დააკავეს, მაშინ როდესაც გენერალური პროკურატურა და უსაფრთხოების სამსახური, საქართველოს ყოფილი პრეზიდენტის ბინას ჩხრეკდა. ჩხრეკის გამო ის შენობის სახურავზე ავიდა და გადმოხტომით იმუქრებოდა. დაკავებიდან რამდენიმე წუთის შემდეგ მიხეილ სააკაშვილი მისმა მხარდამჭერებმა ბლოკირებული მიკროავტობუსიდან გაათავისუფლეს.

9 დეკემბერს, მეორედ დაკავების შემდეგ, მიხეილ სააკაშვილმა უვადო შიმშილობა გამოაცხადა. დაკავებიდან მეორე დღეს, კიევში პეტრო პოროშენკოს იმპიჩმენტისა და სააკაშვილის მხარდასაჭერი მარში გაიმართა. კიევის სასამართლომ მიხეილ სააკაშვილი სასამართლო დარბაზიდან გაათავისუფლა. ამით სასამართლომ პროკურატურის შუამდგომლობა არ დააკმაყოფილა - პროკურორებმა ოდესის ყოფილი გუბერნატორისთვის ელექტრონული სამაჯურით შინაპატიმრობის შუამდგომლობა დააყენეს.

პროკურატურამ გადაწყვეტილება გაასაჩივრა. სააპელაციო სასამართლომ მიხეილ სააკაშვილს შინაპატიმრობა მიუსაჯა. მოსამართლის განცხადებით, საღამოს 22 საათიდან დილის 7 საათამდე საქართველოს მესამე პრეზიდენტს გადაადგილება ეკრძალება.