დაშინების, ფიზიკური ძალადობისა და შეურაცხყოფის ბრალდებებს სასულიერო აკადემიის რექტორი და მართლმადიდებელი ეკლესიის პროტოპრესვიტერი გიორგი ზვიადაძე აბსურდულს უწოდებს. მისი თქმით, ასეთ ბრალდებებზე პასუხი "უხერხულია".

"აკადემია, რომელიც არის უწმინდესი პატრიარქის მიერ დაფუძნებული, უმაღლესი საღვთისმეტყველო სკოლა, რომელსაც ძალიან მაღალი მოწოდება აქვს, რადგან ეს სკოლა ეკლესიის წიაღშია შექმნილი, წარმოუდგენელია, რომ იქ რაიმე ძალადობას ჰქონდეს ადგილი", - განაცხადა ზვიადაძემ.

სტუდენტთა დაშინება, ფიზიკური ძალადობა, მორალური შეურაცხყოფა და სასწავლებლის საბიუჯეტო სახსრებით 55 ათას ლარიანი ავტომანქანის შეძენა - ეს იმ ბრალდებების არასრული ჩამონათვალია, რომელთაც სასულიერო აკადემიის კურსდამთავრებულები სასწავლებლის რექტორს, პროტოპრესვიტერ გიორგი ზვიადაძეს უყენებენ.

რეაგირების თხოვნით, აკადემიის კურსდამთავრებულებმა საქართველოს მართლმადიდებელი ეკლესიის პატრიარქს, ილია მეორესა და წმინდა სინოდის მღვდელმთავრებს წერილით მიმართეს.

წერილში ნათქვამია, რომ თბილისის სასულიერო აკადემიასა და სემინარიაში 2004 წლიდან უმძიმესი მდგომარეობაა. წერილის თანახმად, 2009 წლიდან, მას შემდეგ, რაც სასწავლებლის რექტორად პროტოპრესვიტერი გიორგი ზვიადაძე დაინიშნა ვითარება კიდევ უფრო გართულდა. აკადემიის კურსდამთავრებულები აცხადებენ, რომ დანიშვნის დღიდან რექტორის მიერ ძალაუფლების ბოროტად გამოყენებამ სასწავლებელი კატასტროფულ მდგომარეობამდე მიიყვანა