რეალითი შოუს ვარსკვლავს კაილი ჯენერს და რეპერ ტრევის სკოტს პირველი შვილი შეეძინათ.

კაილის ორსულობის შესახებ ინფორმაცია სექტემბერში გავრცელდა, თუმცა კარდაშიანების და ჯენერების ოჯახი ამ თემას ოფიციალურად არ ადასტურებდნენ.

თუმცა კვირას, 4 თებერვალს, კაილიმ მსოფლიოს ტვიტერიდან ამცნო, რომ პირველ თებერვალს გოგო შეეძინა და ფანებს ბოდიში მოუხადა ინფორმაციის არ მიწოდებისთვის.

"ჩემი ორსულობა ერთადერთი რამ იყო, რაც მინდოდა, რომ მსოფლიოს საყურებელი არ გამხდარიყო" - წერს კაილი და დასძენს, რომ ამ გზით ეცადა მისთვის ამ უმნიშვნელოვანეს პერიოდს სტრესის გარეშე ჩაევლო:

"მსურდა დედობისთვის პოზიტიურად, ჯანმრთელად და სტრესის გარეშე მოვმზადებულიყავი. ვიცი, რომ ჩემი ბავშვი ჩემს ემოციებსა და სტრესს იგრძნობდა და მისი ამ ყველაფრისგან დაცვა მინდოდა".

კაილიმ იუთუბზე 12-წუთიანი ვიდეოც გამოაქვეყნა, სადაც ჩანს ყველა ის მომენტი, რომელსაც მისი ფანები ამდენი ხნის განმავლობაში ელოდნენ.