თბილისის ბაგა-ბაღების გაერთიანებაში აცხადებენ, რომ საბავშვო ბაღებში აღსაზრდელების კვების რაციონი ბავშვის სწორ განვითარებაზეა ორიენტირებული. ამის შესახებ სააგენტომ დღეს, 29 იანვარს განცხადება გაავრცელა.

"ჩვენი პრიორიტეტი ბავშვების სწორ განვითარებაზე ზრუნვაა და მენიუც შედგენილია სწორედ ამ პრიორიტეტის გათვალისწინებით. უფრო კონკრეტულად, თბილისის ბაგა-ბაღებში კვების სტანდარტი შესაბამისობაშია საქართველოს მთავრობის 2017 წლის 30 ოქტომბრის #487 დადგენილებასთან, რომელიც, თავის მხრივ, ეყრდნობა გაერო-ს ბავშვთა ფონდის (UNICEF) რეკომენდაციებს", - აცხადებენ სააგენტოში.

მათივე განმარტებით, მენიუ შექმნილია სააგენტოს შესაბამისი მიმართულების სპეციალისტების მიერ, საქართველოს შრომის, ჯანმრთელობის და სოციალური დაცვის სამინისტროს ექსპერტის ნუტრიციოლოგიაში, დ.ტვილდიანის სახელობის სამედიცინო უნივერსიტეტის პროფესორის, პროფილაქტიკური მედიცინის აკადემიის აკადემიკოსის გულნარა დვალის უშუალო ჩართულობით.

"მენიუ შედგენილია იმგვარად, რომ ბავშვის კვების რაციონში გამოყენებულია ყველა ის ძირითადი პროდუქტი, რომელიც აუცილებელია ბავშვის სწორი ზრდა-განვითარებისთვის. აღსაზრდელების ყოველდღიური რაციონის ენერგეტიკული ღირებულება 1292 კკალორიას შეადგენს. გარდა ამისა, რაციონში გათვალისწინებულია ნუტრიციოლოგიაში უკვე დამკვიდრებული თანამედროვე ტენდენციები, როგორიცაა მარილის და მარტივი შაქრის რაოდენობის შემცირება ბავშვთა კვებაში. რაციონიდან ამოღებულია ასევე ტკბილი და კოფეინშემცველი სასმელებიც: შავი ჩაი, კაკაო, კომპოტები, ხილის კონსერვირებული წვენები. სამაგიეროდ, ყოველდღიურ რაციონში გათვალისწინებულია ახალი ხილი, ბოსტნეული, ხორცი, თევზი, რძე, რძის პროდუქტები", - განმარტავენ სააგენტოში.

ამავე თემაზე: