ლეგენდარული ტელეწამყვანი, ყველაზე მხიარული, სასაცილო, ძალიან ჭკვიანი და უბრალოდ შეუდარებელი ელენ დეჯენერესი უკვე 60 წლის არის.

როგორც ელენი ამბობს, ამ დღის აღსანიშნავად, მისთვის საუკეთესო საჩუქარი იქნება თუ ლოს-ანჯელესის ზოოპარკიდან, 30 წლიანი ტყვეობის შემდეგ, სპილოს გაათავისუფლებენ.

დეჯენერესმა სპილო ბილის გასათავისუფლებად პეტიციაც შეადგინა და ზოოპარკის ადმინისტრაციას სთხოვს, რომ ცხოველი მის სამშობლოში, მალაიზიაში დააბრუნონ.

ელენმა საკუთარი კარიერის განმავლობაში, რომელიც 40 წელზე მეტს ითვლის, ძალიან ბევრი რამ გააკეთა, არამხოლოდ თავის საქმიანობაში, არამედ, სამყაროს უკეთესობისკენ შეცვლაშიც.

ელენი იყო პირველი ღიად ლესბოსელი ქალი, რომელიც თოქ-შოუს წამყვანი გახდა, ამავდროულად ის ყოველ წელს ხვდება Forbes-ის ყველაზე მაღალანაზღაურებადი სატელევიზიო ვარსკვლავების სიაში და Hollywood Reporter-ის სიაში, როგორც შოუბიზნესის ყველაზე გავლენიანი ადამიანი.

2016 წელს, აშშ-ის ყოფილმა პრეზიდენტმა, ბარაკ ობამამ მას თავისუფლების საპრეზიდენტო მედლი გადასცა. ესაა ყველაზე მაღალი ჯილდო, რომელიც ამერიკის მოქალაქემ შეიძლება მიიღოს.

1997 წელს, როდესაც ელენის სერიალის მეოთხე სეზონი გადიოდა, დეჯენერესმა ქამინგ აუთი (საკუთარი სექსუალური ორიენტაციის გამჟღავნება) გააკეთა. ამავე პერიოდში ის ჟურნალ Time-ის მთავარი პერსონაჟიც გახდა და ოპრა უინფრის შოუშიც ხმამაღლა ისაუბრა ამ თემაზე.