პარლამენტის დეპუტატმა, ზაქარია ქუცნაშვილმა თიანეთის სოფელ ხევსურთსოფელში, საკუთარ რესტორან ერწოს იდიალიაში, მისი და სამი სხვა პარლამენტარის ქეიფის ხარჯი გასული წლის 10 აგვისტოს, თიანეთის გამგეობის ბიუჯეტით გადაიხადა.

ამის შესახებ ინფორმაციას სააგენტო რეგინფო ავრცელებს, სადაც სტატიას დართული აქვს დოკუმენტები სარესტორნო მომსახურების შესახებ და მიღება-ჩაბარების აქტი. სუფრის მთლიანმა დანახარჯმა 459 ლარი შეადგინა.

იმ პერიოდში თიანეთის მუნიციპალიტეტის გამგებელი ზაქარია ქუცნაშვილის ნდობით აღჭურვილი პირი ლელა ქიტესაშვილი იყო.

სააგენტოს მიერ მოპოვებული ინფორმაციით, ზაქარია ქუცნაშვილთან ერთად, თიანეთში იმყოფებოდნენ პარლამენტის საგარეო ურთიერთობათა კომიტეტის თავმჯდომარე სოფიო ქაცარავა, მისი მოადგილეები ნინო გოგუაძე და დიმიტრი ცქიტიშვილი, ასევე ეროვნულ-დემოკრატიული ინსტიტუტის (NDI) წარმომადგენელი თეონა ყუფუნია.

აღნიშნულის შესახებ სრულად წაიკითხავთ რეგინფოს ვებ-გევრდზე.