აშშ-ში ტანვარჯიშის ეროვნული ნაკრების ყოფილ ექიმს, ლარი ნასარს სპორტსმენების სექსუალური ძალადობისთვის 175-წლიანი პატიმრობა მიუსაჯეს. მიჩიგანის შტატის სასამართლომ 156 მსხვერპლის ჩვენება მოისმინა.

ნასარის მცდელობა, სასამართლოზე ჩადენილისთვის ბოდიში მოეხადა, მოსამართლემ არ მიიღო და მის სიტყვებს ყალბი უწოდა და დაამატა, რომ ის მთელ ცხოვრებას ციხეში გაატარებდა.

ნასარმა დანაშაული ათი ტანმოვარჯიშის მიმართ აღიარა, მათ შორის, ოლიმპიური თამაშების მონაწილეებიც არიან.

მანამდე 54 წლის ექიმს საბავშვო პორნოგრაფიის შენახვისთვის 60 წელი მიუსაჯეს. განაჩენის გამოცხადების დროს მოსამართლე როზმარი აკილინმა განაცხადა:

"ისევე, როგორც ჩემთვის პატივი იყო ჩემი დების აღიარება მომესმინა, რომლებმაც სექსუალური ძალადობა გადაიტანეს, პატივი და პრივილეგია მერგო განაჩენი გამოგიტანოთ. თქვენ არ იმსახურებთ, რომ ოდესმე თავისუფლებაზე მოხვდეთ. თქვენ ჯერ ისე ვერ გააცნობიერეთ, რა ჩაიდინეთ. ჩემი ძაღლების მოვლის საშუალებასაც არ მოგცემდით. ახლა თქვენ სასიკვდილო განაჩენს მოვაწერე ხელი".

განაჩენის გამოცხადებამდე სასამართლო შვიდი დღის განმავლობაში მსხვერპლი ქალების ჩვენებებს ისმენდა.