ბასიანის დაცვის დაჭრაში ბრალდებულის, თამაზ ქვლივიძის ადვოკატმა, ზაზა მესხმა ჟურნალისტებთან განაცხადა, რომ აღკვეთის ღონისძიებად გირაოს ნაცვლად პატიმრობის შეფარდება მოსამართლეზე ზეწოლის შედეგია. თბილისის სააპელაციო სასამართლომ თამაზ ქვლილიძის საქმეზე გადაწყვეტილება დღეს მიიღო.

"გადაწყვეტილება არის უკანონო, დაუსაბუთებელი და იმის შედეგი, რომ მოსამართლეზე, სამწუხაროდ, მოხდა ზეწოლა და მან ვერ გაუძლო ამ ზეწოლას", - თქვა ზაზა მესხმა.

მისივე თქმით, მოსამართლეზე ზეწოლა იყო საზგოდოებისა და კლუბ ბასიანის მფლობელებისგან, რომლებიც "დაუსაბუთებელ განცხადებებს აკეთებდნენ".

ქვლივიძის ადვოკატი სასამართლოს გადაწყვეტილების გამოცხადებამდე აღნიშნავდა, რომ ბრალდებულის დაპატიმრების შემთხვევაში აქციებს გამართავდნენ.

ბასიანის წარმომადგენლის, ნაჯა ორაშვილის ინფორმაციით, მას შემდეგ, რაც 13 იანვარს თავდამსხმელი კლუბში არ შეუშვეს, მან კლუბის დაცვის უფროსს და დაცვის წევრებს რამდენიმე ჭრილობა მიაყენა. მისივე თქმით, ბრალდებულმა ჭრილობები მიაყენა დიდუბე-ჩუღურეთის სამმართველოს განყოფილების უფროსის მოადგილესაც.

15 იანვარს, კლუბ ბასიანის დაცვის წევრების დაჭრაში ბრალდებული თბილისის საქალაქო სასამართლომ 30 ათას ლარიანი გირაოს სანაცვლოდ გაათავისუფლა.