თბილისის სააპელაციო სასამართლომ ბასიანის დაცვის დაჭრაში ბრალდებულს, თამაზ ქვლივიძეს აღკვეთის ღონისძიებად გირაოს ნაცვლად პატიმრობა შეუფარდა. სასამართლომ გადაწყვეტილება რამდენიმე წუთის წინ გახდა ცნობილი. ქვლივიძე სასამართლო დარბაზში დააკავეს.

ფოტო: On.ge

მოსამართლე სპარტაკ პავლიაშვილის თქმით, ოჯახში ძალადობის საქმეებზე სასამართლოს სილის გაწნაზეც კი ბრალდებულისთვის პატიმრობა შეუფარდებია და ასეთი სიღრმეების ჭრილობაზე, გირაო საკმარისი არ იქნებოდა.

ბასიანის დამფუძნებლის, ნაჯა ორაშვილის ინფორმაციით, მას შემდეგ, რაც 13 იანვარს თავდამსხმელი კლუბში არ შეუშვეს, მან კლუბის დაცვის უფროსს და დაცვის წევრებს რამდენიმე ჭრილობა მიაყენა. მისივე თქმით, ბრალდებულმა ჭრილობები მიაყენა დიდუბე-ჩუღურეთის სამმართველოს განყოფილების უფროსის მოადგილესაც.

ბრალდებულის ადვოკატის თქმით, ინციდენტის დროს პოლიციელს არ ეცვა ფორმა და არც ბრალდებულისთვის მოუწოდებია წესრიგი დაეცვა. მანვე აღნიშნა, რომ მათი დაცვის ქვეშ მყოფი არ არის ნასამართლევი.

დაცვის მხარემ სასამართლო სხდომაზე განაცხადა, რომ ამ დღეებში გაკეთებული განცხადებები პოლიტიკოსების მიერ პირდაპირი ზეწოლაა სასამართლოზე. გარდა ამისა, არ დაეთანხმა ბრალდებას და განმარტა, პროცესზე ბრალდებულის გამოცხადება ადასტურებს, რომ მიმალვის საფრთხე არ არსებობს.

"დაცვის თანამშრომელი ისეთი არაადეკვატური იყო, რომ ასე მგონია რაღაცის ზემოქმედების ქვეშ იყო", - აღნიშნა ბრალდებულმა.

ბრალდების მხარე ვარაუდობს რომ თავისუფლების პერიოდში ბრალდებული ისევ მიაყენებს ზიანს დაზარალებულებს და მიემალება გამოძიებას. ამ მიზეზით, აღნიშნეს სასამართლო სხდომაზე, რომ პატიმრობა ერთადერთი ფორმაა, რომელიც უნდა იყოს შეფარდებული.

15 იანვარს, კლუბ ბასიანის დაცვის წევრების დაჭრაში ბრალდებული თბილისის საქალაქო სასამართლომ 30 ათას ლარიანი გირაოს სანაცვლოდ გაათავისუფლა. პროკურატურა პირისთვის აღკვეთის ღონისძიებად პატიმრობას ითხოვდა და საჩივრით სააპელაციო სასამართლოს მიმართა.