დეპუტატი, გია ვოლსკი აცხადებს, რომ აფგან მუხტარლის თბილისიდან გაუჩინარებაზე პასუხისმგებლობა ქართულ ოცნებას არ ეკისრება. მისი თქმით, მუხტარლი რამდენიმე წლის განმავლობაში მუშაობდა საქართველოდან აზერბაიჯანის ხელისუფლების წინააღმდეგ, თუმცა ამის თაობაზე არავის სმენია:

"ცენტრიდან გაიტაცეს ადამიანი და ამასთან დაკავშირებით არც ერთი მოწმე არ აღმოჩნდა და არც ერთ ჩანაწერში ეს არ ფიგურირებს. გარკვეულ ეჭვებს აჩენს ბრალდებები, რომელიც აფგან მუხტარლის ცოლის მხირდან გაისმის. რაც არის რეალობა, დიდი იმედი მაქვს, რომ გამოძიებაში ჩახედული პირები მეტ განმარტებას მოგვცემენ."

თბილისიდან 29 მაისს გაუჩინარებულ აზერბაიჯანელ ჟურნალისტს, აფგან მუხტარლის ბელაქანის რაიონულმა სასამართლომ 6-წლიანი პატიმრობა მიუსაჯა. მას აზერბაიჯანში საზღვრის უკანონო კვეთასა და 10 ათასი ევროს არადეკლარირებულად გადატანას ედავებიან.

მუხტარლი, რომელიც გაუჩინარებიდან მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს.

მუხტარლის დაკავებიდან რამდენიმე კვირაში, აზერბაიჯანის მმართველი გუნდის პარლამენტარმა ელმან ნასიროვმა რადიო თავისუფლებასთან ინტერვიუში თქვა, რომ მუხტარლის დაკავება აზერბაიჯან-საქართველოს სპეცსამსახურების წარმატებული ოპერაცია იყო.

აფგან მუხტარლის ცოლი, ჟურნალისტი ლეილა მუსტაფაევა თავისი ქმრის დაკავებაზე პასუხისმგებლობას აზერბაიჯანთან ერთად, საქართველოს ხელისუფლებასაც აკისრებს:

"აზერბაიჯანისა და საქართველოს მთავრობებმა გაანეიტრალეს ერთი გამომძიებელი ჟურნალისტი, მისი თავისუფლების შეზღუდვითა და ციხეში ჩასმით. მიუხედავად ამისა, მე და მისი კოლეგები გავაგრძელებთ ამ საქმეების გამოძიებას".