ბრიტანული როკ-ბენდის, რედიოჰედის, ოფიციალური წარმომადგენლები უარყოფენ ლანა დელ რეის განცხადებას იმაზე, რომ ბენდი ამერიკელი მომღერლის წინააღმდეგ სასამართლოში სარჩელის შეტანას აპირებს.

საქმე ეხება ლანას ახალ ალბომ Lust For Life-ში შესული სიმღერა Get Free-სა და ჯგუფის 1992 წლის სიმღერა Creep-ის ერთმანეთთან მსგავსებას.

"გასული წლის აგვისტოდან, ლანა დელ რეის წარმომადგენლებთან ამ თემაზე ვსაუბრობდით. აშკარაა, რომ ლანას სიმღერაში ქრიფის ელემენტები არის და ვითხოვეთ, რომ ეს აღნიშნულიყო ქრიფის ავტორების საპატივსაცემოდ" - აცხადებენ რედიოჰედის გამომცემლები და დასძენენ, რომ ინგლისური ბენდი Get Free-ს გამოცემის 100%-ს არ ითხოვს.

განსხვავებული ინფორმაცია გაავრცელა ლანა დელ რეიმ ტვიტერზე, 7 იანვარს:

"სარჩელზე გავრცელებული ინფორმაცია სიმართლეა. ამასთან ერთად, მე ვიცი, რომ ჩემი სიმღერის ინსპირაცია Creep არ ყოფილა. რედიოჰედი ფიქრობს, რომ ეს ასეა და სურს, რომ გამოცემის 100% მათ მიიღონ. მე ბოლო თვეების განმავლობაში მათ 40%-ს ვთავაზობდი, მაგრამ ისინი ამბობენ, რომ მხოლოდ 100%-ს მიიღებენ. მათი ადვოკატები უკან არაფერზე იხევენ, ამიტომ სასამართლოში შევხვდებით".

აღსანიშნავია, რომ Creep-ის გამოსვლის შემდეგ, რედიოჰედს ინგლისური ბენდ Hollies-ის 1974 წლის The Air That I Breathe-ის მსგავსების გამო უჩივლეს, რომელიც ალბერტ ჰემონდისა და მაიკ ჰაზლევუდის დაწერილია. სასამართლოს გადაწყვეტილებით, Creep-ის ავტორებად აღნიშნული პირებიც დაემატნენ.