ჰოლივუდიდან გამოძევებულ ჰარვი ვაინშტაინს არიზონას რესტორანშიც არ ხვდებიან გაშლილი ხელებით.

ამერიკული ტაბლოიდი TMZ იუწყება, რომ ვაინშტაინი, რომელიც რეაბილიტაციას გადის, საღამოს 9 საათისთვის რესტორანში სავახშმოდ თავის ინსტრუქტორთან ერთად მივიდა, როდესაც რესტორანში მყოფმა კაცმა მასთან ფოტოს გადაღება ითხოვა, ვაინშტაინმა კი ამაზე უარი განაცხადა.

როდესაც შერცხვენილი პროდიუსერი და მისი ინსტრუქტორი წამოდგნენ და წასასვლელად მოემზადნენ, რესტორანში მყოფმა კაცმა მეგობარს უთხრა, კამერა ჩაერთო. ვიდეოში ჩანს, რომ ვაინშტაინთან კაცი მიდის, სახეში სილას აწნის.

"ნამდვილი ნაძირალა ხარ, იმის გამო, რაც ქალებს გაუკეთე, მოშორდი აქედან!" - ამბობს ის.

TMZ-ის ცნობით, ვაინშტაინმა პოლიციის გამოძახებაზე უარი განაცხადა და ადგილი დატოვა. TMZ-ის მიერ გავრცელებულ ინფორმაციას USA Today-სთან ვაინშტაინის წარმომადგენელი ადასტურებს.

ვაინშტაინი 90-ზე მეტმა ქალმა დაადანაშაულა სექსუალურ შევიწროებასა და გაუპატიურებაში. მის საქმეს ლონდონისა და ლოს-ანჯელესის პოლიცია იძიებს.