ამერიკის კინოაკადემიამ, რომელიც ყოველწლიურად ოსკარებს გასცემს, ხანგრძლივი კრიტიკის შემდეგ პირველი ნაბიჯი გადადგა წევრთა გენდერული და ეთნიკური მრავალფეროვნების უზრუნველსაყოფად. კინოაკადემიამ წევრობის შესახებ მოწვევა 700-მდე პირს გაუგზავნა, რომელთა შორის ნახევარზე მეტი ქალია, ასევე, სხვადასხვა რასის წარმომადგენელი.

ამერიკის კინოაკადემიას 6 000 წევრი ყავს, რომელთა დიდ ნაწილს თეთრკანიანი, 60 წელს გადაცილებული მამაკაცები წარმოადგენენ. იმ შემთხვევაში, თუ ყველა მიწვეული პირი დათანხმდა წევრობას, კინოაკადემიაში მამაკაცთა 75%-იანი წილი შემცირდება 73%-მდე, ხოლო თეთრკანიანთა რაოდენობა - 92%-დან 89%-მდე. კინოაკადემია არაერთხელ გაუკრიტიკებიათ იმისთვის, რომ ის არ იყო მრავალფეროვანი.

აკადემიის განცხადებით, ახალმოწვეულებში არიან მსახიობი ჯონ ბოიეგა ვარსკვლავური ომებიდან, ემა უოტსონი ჰარი პოტერიდან, ოსკარის მფლობელი შვედი ალისია ვიკანდერი და მერი ჯეი ბლაიჯი.