აშშ-ს პრეზიდენტის ადმინისტრაციამ, მექსიკის საზღვარზე კედლის მშენებლობის საწყისი ეტაპისთვის, კონგრესისგან $18 მილიარდი მოითხოვა. ინფორმაციას ამის შესახებ Washington Post ავრცელებს.

დონალდ ტრამპის ერთ-ერთ მთავარ წინასაარჩევნო დაპირებას სწორედ მექსიკის საზღვარზე კედლის მშენებლობა წარმოადგენდა. მოსალოდნელია, რომ აღნიშნული თანხა კედლის მშენებლობის საწყის ეტაპს მოხმარდება.

აშშ-ს საბაჟო და საზღვრის უსაფრთხოების სამინისტროს ინფორმაციით, კედლის მშენებლობა, სულ, $33 მილიარდი დაჯდება და მშენებლობის პროცესი 2027 წელს დასრულდება. $18 მილიარდი, რომელსაც პრეზიდენტის ადიმინისტრაცია კონგრესისგან ითხოვს, სავარაუდოდ, 508 კმ სიგრძის სასაზღვრო ბარიერის მშენებლობას და არსებული სასაზღვრო კონსტრუქციების გამაგრებას მოხმარდება.

დასახელებული თანხების გარდა, დამატებით $8 მილიარდი იქნება საჭირო ახალი პერსონალისთვის და მათი გაწვრთნისთვის. ასევე, ჯამურად $6 მილიარდი დოლარი იქნება საჭირო ახალი სასაზღვრო კონსტრუქციის ტექნიკური გამართულობისთვის.

მექსიკის საზღვარზე კედლის მშენებლობის გეგმები ტრამპმა არჩევნებში გამარჯვების შემდეგაც დაადასტურა და განაცხადა, რომ ქვეყნის ტერიტორიას დაატოვებინებდა 3 მილიონ მიგრანტს რომლებიც აშშ-ში არალეგალურად იმყოფებიან.

2017 წლის მარტში თეთრ სახლმა კონგრესს კედლის ტექნიკური მახასიათებლები წარუდგინა. პროექტის თანახმად, კედელი იმგვარად უნდა იყოს აშენებული, რომ ამ ფიზიკური ბარიერის დაძლევისთვის, მინიმუმ, 30 წუთი იყოს საჭირო.