კომპანია, რომელიც დიღომში, თბილისი მოლში მდებარე ჰიპერმარკეტ კარფურს მზა საკვებით ამარაგებს, სურსათის ეროვნულმა სააგენტომ მიმდინარე წლის დეკემბერში, დარღვევების გამო, 1 000 ლარით დააჯარიმა. შესაბამისი დოკუმენტები On.ge-ს კონფიდენციალურმა წყარომ მიაწოდა.

2017 წლის 7 და 8 დეკემბერს, კარფურში ნაყიდი ქათმის სალათით, ბადრიჯანი ნიგვზით, სალათითა და ბადრიჯანი მაიონეზით მოწამვლის საჩივრით სურსათის სააგენტოს ორმა მომხმარებელმა მიმართა.

ამ ადამიანებს სააგენტომ პასუხად მისწერა, რომ შემოწმების შედეგად, ჰიპერმარკეტში დარღვევები ვერ აღმოაჩინა. სამაგიეროდ სააგენტომ კრიტიკული და არაკრიტიკული დარღვევები დაადგინა შპს გურმანოში, რომელიც კარფურს მზა საკვებით ამარაგებს:

"ბიზნესოპერატორს ხორცის საყინულე მაცივარსა და ხორცის კერძების დამამზადებელ საამქროში შეუჩერდა საწარმოო პროცესი კრიტიკული შეუსაბამობების გამოსწორებამდე... დაჯარიმდა 1 000 ლარის ოდენობით. არაკრიტიკული შეუსაბამობების გამოსასწორებლად ბიზნესოპერატორს მიეცა რეკომენდაციები და გონივრული ვადა."

ფოტო 1: On.ge / ფოტო 2: On.ge

წყარო, რომელსაც თავისი ვინაობის გამხელა არ სურს, ამბობს, რომ ასეთ საკითხზე On.ge-ზე რამდენიმე თვის წინ მასალა წაიკითხა და იმედი გაუჩნდა, რომ რაიმე შეიცვლებოდა, მაგრამ მისივე თქმით, ყველაფერი ძველებურად გრძელდება.

"ცდილობენ მიაჩუმათონ ეს დარღვევები ყველანაირად, მათ ხელთ არსებული მეთოდებით, თუნდაც ეს მერამდენე შემთხვევაა. პატრონი კი არაა და უკვე ყველა დავიღალეთ. იქნებ ამ ბოლო შემთხვევების შემდეგ ვინმე დაფიქრდეს და ელემენტალურად დასვან კითხვები."

შპს გურმანოს გენერალური დირექტორი, სანდრო ნორაკიძე ადასტურებს, რომ სურსათის სააგენტომ დარღვევები ნამდვილად აღნოაჩინა, თუმცა ამბობს, რომ ეს სანიტარიას და ჰიგიენას არ უკავშირდება. მისივე თქმით, შეუსაბამომებები ასეთი იყო:

  • მაცივარში ქათამი და თევზი მოთავსებული იყო ერთად, რაც დარღვევაა სტანდარტის მიხედვით;
  • სავინტილაციო მილი არ იყო სრულყოფილად გაწმენდილი, რაც ცეცხლსაშიშია;
  • ხორცის დეფროსტი (გალღობა) ხდებოდა 15 გრადუსზე, სტანდარტით კი 5 გრადუსია გათვალისწინებული.

"ჩვენ ლაბორატორიულ დონეზე ვამოწმებთ ყოველდღიურად პროდუქციას. არ გამოვრიცხავ, რომ რაღაც ჩვენი პრობლემა ყოფილიყო იმ ადამიანების მიმართ, რომლებმაც სურსათის სააგენტოს მიმართეს, მაგრამ ეს პროდუქცია, რასაც ჩვენ კარფურს ვაწვდით არის ვაკუუმ პარკებში ეტიკეტირებული. ყველას აქვს თავისი ვარგისიანობის ვადა. კარფურში ჩვენი მერჩენდაიზერები არიან, ანუ ის ადამიანები, რომლებიც სექციას ემსახურებიან. მათ იციან, რომ ყოველ საღამოს წინა დღის პროდუქტი მთლიანად იხსნება და მიდის ვეისტში," - ამბობს ნორაკიძე.

On.ge დაუკავშირდა სურსათის ეროვნულ სააგენტოსაც, თუმცა მათგან კითხვებზე პასუხი ვერ მიიღო.