თბილისის საქალაქო სასამართლომ უცვლელი დატოვა ოთარ აბესაძის მიმართ აღკვეთის ღონისძიება და ის პატიმრობაში დატოვა. აბესაძე ქრთამის აღების ბრალდებით 11 ივლისს დააკავეს.

როგორც მისმა ადვოკატმა, ირმა ჭკადუამ On.ge-ს განუცხადა, აბესაძეს ჯანმრთელობის პრობლემები აქვს და სასამართლოს დღევანდელი სხდომაც ამ მიზეზით შეწყდა. ის პასუხისმგებლობას #8-ე სასჯელაღსრულების დაწესებულების ადმინისტრაციას, ექსპერტებსა და სასამართლოს აკისრებს.

"ადმინისტრაცია ჩვენთან საუბრობს, რომ ეს არის ძალიან მძიმე შემთხვევა და მათ უჭირთ მეთვალყურეობა ოთარ აბესაძეზე, ხოლო პროკურატურა ამბობს, რომ ადმინისტრაცია მათ ეუბნება, რომ ის კარგადაა. მაშინ ექსპერტებს უნდა დაეწერათ, რომ ოთარ აბესაძე სიმულიანტია. მსგავსი ექსპერტიზის დასკვნაში არ წერია. პირიქით, ექსპერტიზის დასკვნა არის ძალიან საყურადღებო და სახელმწიფომ უნდა აიღოს პასუხისმგებლობა მის ჯანმრთელობაზე და სიცოცხლეზე", - აღნიშნა ჭკადუამ.

ჭკადუა მისი დაცვის ქვეშ მყოფის პატიმრობაში დატოვების მიზეზზეც საუბრობს.

"დღეის მდგომარეობით ოთარ აბესაძე არის ქართული ოცნების მძევალი, მეტს ვერაფერს ვიტყვი. ის იყო მათი მხარდამჭერი და დღეს ისჯება იმიტომ, რომ არის მათი აქტივისტი. რეალურად, ყველამ გაწირა ეს ადამიანი და ებრძვის სიცოცხლეს. ამ წუთში მიმდინარეობს ბრძოლა, რომ ეს ადამიანი ფიზიკურად გადარჩეს", - ამბობს ჭკადუა.

თბილისის მერიის თანამშორმელი, ოთარ აბესაძე სახელმწიფო უსაფრთხოების სამსახურმა დააკავა. სუს-ის ინფორმაციით, გამოძიებამ დაადგინა, რომ ოთარ აბესაძე მოქალაქეებს თბილისში, მდინარე მტკვარზე, ტივზე ინფრასტრუქტურის მოწყობისთვის საჭირო ნებართვების, სამი ათასი დოლარის სანაცვლოდ, აღებას დაჰპირდა.