თანასწორობის მოძრაობის ინფორმაციით, 20 დეკემბერს, თბილისის საქალაქო სასამართლომ დააკმაყოფილა ეგვიპტის მოქალაქის, ვაგდი ა.ა.მ.ა. ელკორაეის სასარჩელო მოთხოვნა, საქართველოში თავშესაფრის მიღებასთან დაკავშირებით. სასამართლომ ბათილად ცნო საქართველოს ლტოლვილთა სამინისტროს გადაწყვეტილება ლტოლვილის სტატუსის მინიჭებაზე უარის თქმის თაობაზე და სამინისტროს ახალი გადაწყვეტილების მიღება დაავალა.

მოსარჩელე თავის ქვეყანაში ქრისტიანული სარწმუნოებისა და სექსუალური ორიენტაციის გამო იდევნება. როგორც მოძრაობა ამბობს, სამშობლოში დაბრუნების შემთხვევაში, მას პატიმრობა და სიცოცხლისა და ჯანმრთელობისათვის მნიშვნელოვანი საფრთხე ემუქრება.

ორგანიზაციის ცნობით, ელკორაეიმ საქართველოს ლტოლვილთა სამინისტროს ლტოლვილის ან ჰუმანიტარული სტატუსის მინიჭების მოთხოვნით 2017 წლის იანვარში მიმართა. ლტოლვილთა სამინისტრომ თავშესაფარი არ მისცა და უთხრა, რომ მისი საქართველოში ყოფნა ეწინააღმდეგება ქვეყნის ინტერესებს.

უარის დოკუმენტში, რომელიც სამინისტრომ ელკორაეის გაუგზავნა დადასტურებულია, რომ ეგვიპტის მოქალაქე აკმაყოფილებს ლტოლვილის სტატუსის მინიჭებისთვის საჭირო კრიტერიუმებს. მიუხედავად ამისა, სამინისტროს მტკიცებით, არსებობს საკმარისი საფუძველი ვარაუდისთვის, რომ ელკორაეი საფრთხეს შეუქმნის საქართველოს სახელმწიფო უსაფრთხოებას, ტერიტორიულ მთლიანობას ან საზოგადოებრივ წესრიგს.