ეგვიპტის მოქალაქე ვაგდია ელკორაეიმ, რომელიც თავის ქვეყანაში რელიგიისა და სექსუალური ორიენტაციის ნიშნით იდევნება, ლტოლვილთა სამინისტრომ თავშესაფარი არ მისცა და უთხრა, რომ მისი საქართველოში ყოფნა ეწინააღმდეგება ქვეყნის ინტერესებს. ამის შესახებ ინფორმაციას არასამთავრობო ორგანიზაცია თანასწორობის მოძრაობა ავრცელებს.

ორგანიზაციის ცნობით, ელკორაეიმ საქართველოს ლტოლვილთა სამინისტროს ლტოლვილის ან ჰუმანიტარული სტატუსის მინიჭების მოთხოვნით 2017 წლის იანვარში მიმართა. მას აქვს საფუძვლიანი შიში, რომ იგი შეიძლება გახდეს დევნის მსხვერპლი რასის, რელიგიის, ეროვნების, გარკვეული სოციალური ჯგუფისადმი კუთვნილების ან პოლიტიკური შეხედულების გამო, და არ შეუძლია ან არ სურს, შიშიდან გამომდინარე, დაბრუნდეს თავის წარმოშობის ქვეყანაში ან ისარგებლოს ამ ქვეყნის მფარველობით:

"ვაგდია ისლამიდან ქრისტიანობაზე ჯერ კიდევ ეგვიპტეში ყოფნის დროს გადავიდა. ამასთან, იგი არის გეი, რის გამოც სამშობლოში დაბრუნებისას მას 3-წლიანი პატიმრობა და ფულადი ჯარიმა ემუქრება. კერძოდ, სამშობლოში მას ბრალი წაუყენეს თავაშვებულობის, სახელმწიფო წეს-ჩვეულებათა და ტრადიციათა დარღვევის გამო."

ფოტო: On.ge / თანასწორობის მოძრობა

უარის დოკუმენტში, რომელიც სამინისტრომ ელკორაეის გაუგზავნა დადასტურებულია, რომ ეგვიპტის მოქალაქე აკმაყოფილებს ლტოლვილის სტატუსის მინიჭებისთვის საჭირო კრიტერიუმებს. მიუხედავად ამისა, სამინისტროს მტკიცებით, არსებობს საკმარისი საფუძველი ვარაუდისთვის, რომ ელკორაეი საფრთხეს შეუქმნის საქართველოს სახელმწიფო უსაფრთხოებას, ტერიტორიულ მთლიანობას ან საზოგადოებრივ წესრიგს.

თანასწორობის მოძრაობის შეფასებით გაუგებარია, თუ რას ეფუძნება სამინისტროს ვარაუდი, ვინაიდან გადაწყვეტილება არ შეიცავს არანაირ დასაბუთებას, თუ რა გარემოებების გამო ეწინააღმდეგება ვაგდია ელკორაეის საქართველოში ყოფნა ქვეყნის ინტერესებს.

ორგანიზაციის სამართლებრივი დახმარებით, ლტოლვილთა სამინისტროს უარი ვაგდიმ ელკორაეიმ სასამართლოში გაასაჩივრა. საჩივარი სასამართლომ წარმოებაში უკვე მიიღო.