საქართველოს პრემიერი გიორგი კვირიკაშვილი და პრეზიდენტი გიორგი მარგველაშვილი თურქეთში, ათათურქის აეროპორტში მომხდარი აფეთქების გამო მწუხარებას გამოხატავენ.

"უკიდურეს მწუხარებას გამოვთქვამ სტამბოლის ათათურქის აეროპორტში მომხდარი აფეთქებების გამო, რომელსაც ადამიანების სიცოცხლე შეეწირა, არიან დაშავებულებიც.

შეძრწუნებული ვარ უდანაშაულო ადამიანების მიმართ ჩადენილი ვერაგული აქტით. ეს სისასტიკე მთელმა მსოფლიომ საერთო ძალისხმევით უნდა შეაჩეროს.
ამ მძიმე წუთებში გამძლეობას ვუსურვებ თურქ ხალხს და თურქეთის მთავრობას", – ნათქვამია პრემიერის განცხადებაში. რაც შეეხება პრეზიდენტს, ის თანადგომას უცხადებს თურქ ხალხსა და ხელისუფლებას:

"შეძრწუნებული ვარ სტამბოლის ათათურქის აეროპორტში განხორციელებული ტერორისტული აქტის გამო, რომელსაც მსხვერპლი მოჰყვა. ამ განსაცდელის ჟამს ვუსამძიმრებ დაღუპულთა ოჯახებს, მტკიცე თანადგომას ვუცხადებ თურქეთის ხელისუფლებას და თურქ ხალხს ტერორიზმთან ბრძოლაში".

BBC-ის ინფორმაციით, ათათურქის აეროპორტში აფეთქების მსხვერპლთა რაოდენობა 32–მდე გაიზარდა, AP–ის ცნობით კი, დაღუპულია 50–მდე ადამიანი.