იგეგმებოდა თუ არა ტერაქტი და როგორ შემოაღწიეს ტერორისტებმა ქვეყანაში - პარტია ევროპული საქართველო ხელისუფლებისგან პასუხებს ითხოვს. პარტიის ერთ-ერთი ლიდერი სერგი კაპანაძე აცხადებს, რომ სუს-ის ხელმძღვანელმა, ვახტანგ გომელაურმა და იუსტიციის მინისტრმა, თეა წულუკიანმა ყველა კითხვას უნდა გასცენ პასუხი:

"პარლამენტში მოვიდეს ერთის მხრივ, სუს-ის ხელმძღვანელობა და მეორეს მხრივ, იუსტიციის მინისტრი, რათა მათ მისცენ განმარტება მთელ რიგ კითხვებთან დაკავშირებით. კერძოდ - იყო თუ არა ნამდვილად ჩატაევი ამ ოპერაციის შედეგად ლიკვიდირებული. თუ იყო, როგორ მოხვდა ის საქართველოში, როგორ მოხდა ეს ჯგუფი ზოგადად საქართველოში და რა მიზნებს ისახავდნენ ისინი, აპირებდნენ თუ არა ტერაქტის მოწყობას, როგორ შემოიტანეს მათ იარაღი საქართველოში. ეს არის კითხვები, რომელზეც ჩვენ უნდა მივიღოთ პასუხები საჯაროდ".

სპეცოპერაციის საკითხს სხდომაზე საპარლამენტო უმცირესობა დააყენებს. ქვეყნის უსაფრთხოება და გაბრიელ სალოსის გამზირზე ჩატარებული ანტიტერორისტული ოპერაცია იქნება ნდობის ჯგუფის პირველი, საორგანიზაციო სხდომის ერთ-ერთი მთავარი თემა.

"როგორ შემოიტანეს ამდენი იარაღი, როგორ ჩატარდა სპეცოპერაცია და ა.შ. რაზეც ჩვენ საჯაროდ მოვითხოვეთ პასუხების გაცემა პარლამენტში, თუმცა, თუ ხელისუფლება ფიქრობს, რომ რომელიმე საკითზე საუბარი უნდა წარიმართოს დახურულ ფორმატში, რა თქმა უნდა, სწორედ ამისთვის არსებობს ნდობის ჯგუფი", - აღნიშნა ირაკლი აბესაძემ.

სპეცოპერაცია ისანში

თბილისში, ისანში, ბერი გაბრიელ სალოსის ქუჩაზე, 21-22 ნოემბრის სპეცოპერაციის შედეგად, დაიღუპა ერთი სპეცრაზმელი და დაიჭრა ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი, ერთი კი დაკავებულია. გამოძიება სიხლის სამართლის კოდექსის 3231-ე მუხლის პირველი ნაწილითა და 328-ე მუხლით მიმდინარეობს, რაც ტერორზმთან დაკავშირებული მუხლებია.

ისნის სპეცოპერაციის დროს დაკავებულს, დახურულ სხდომაზე, აღკვეთის ღონისძიებად პატიმრობა 24 ნოემბერს შეეფარდა. ტერორიზმში ბრალდებული პირის ვინაობას, მის სახელსა და გვარს არც მისი ადვოკატი და არც პროკურორები ამხელენ. თუმცა ცნობილია მისი ინიციალები - ს.დ. რუსთავი 2-ის ინფორმაციით, დაკავებული პირი ლაფანყურის სპეცოპერაციასთან დაკავშირებული სუხო დუდაევია. ტელეკომანიის განცხადებით, აღნიშნული ინფორმაცია მას სანდო წყარომ დაუდასტურა.

რა ვიცით და რა არ ვიცით ისნის სპეცოპერაციის შესახებ