ლეოგრანდის მფლობელმა ეროლ ავგორენმა 24 ნოემბერს გაჩენილ ხანძართან დაკავშირებით ჟურნალისტებს განუცხადა, რომ მის სასტუმროში უსაფრთხოების ნორმები დაცული იყო. მან ასევე განაცხადა, რომ დასაქმებული პერსონალი შეინარჩუნებს სამსახურს:

"დეტალუტად ადვოკატები ისაუბრებენ, მაგრამ მოკლედ ვიტყვი, რომ აღნიშნული სასტუმრო შეესაბამებოდა უსაფრთხოების სტანდარტებს. დიდ მწუხარებას გამოვთქვამთ გარდაცვლილი ადამიანების წინაშე, ვიზიარებთ მწუხარებას. აღნიშნული ფაქტიდან გამომდინარე, საერთოდ არ გვიძინია, მათ მწუხარებას ჩვენც ვიზიარებთ. დღეს გლოვის დღეა და გამომდინარე აქედან მოვინახულებთ გარდაცვლილების ოჯახებს. ჩვენ შეგვიძლია ყველაფერი გავაკეთოთ რაც საჭირო იქნება მათი ოჯახებისთვის, რათა მათი მწუხარება გავიზიაროთ მათთან ერთად".

სასტუმროს მფლობელმა მადლობა გადაუხადა პოლიციასა და სახანძრო სამსახურს.

24 ნოემბრის ღამეს, ბათუმში, სასტუმრო ლეოგრანდში გაჩენილი ხანძრის შედეგად, 11 ადამიანი დაიღუპა. მათ შორის, 10 საქართველოს, ხოლო ერთი ირანის მოქალაქე. მაშველებმა და პოლიციელებმა სასტუმროს შენობიდან ასზე მეტი ადამიანის ევაკუაცია მოახდინეს. 20-მდე ადამიანი სხვადასხვა სირთულის ინტოქსიკაციის გამო, ბათუმის კლინიკებში გადაიყვანეს. შინაგან საქმეთა მინისტრმა, გიორგი გახარიამ განაცხადა, რომ შენობაში სახანძრო ნორმები და მოთხოვნები დარღვეული იყო.