ისნის სპეცოპერაციის დროს დაკავებულს აღკვეთის ღონისძიებად პატიმრობა შეეფარდა. სასამართლომ ამით პროკურატურის შუამდგომლობა დააკმაყოფილა. დაცვის მხარე ამ განჩინების სააპელაციო სასამართლოში გასაჩივრებას აპირებს.

შუამდგომლობის განხილვისას ბრალდების მხარემ რა არგუმენტები წარუდგინა სასამართლოს უცნობია, რადგან სხდომა დახურული იყო.

ამ დრომდე უცნობია ტერორიზმის ბრალდებით დაკავებული პირის ვინაობა. მის სახელსა და გვარს არც მისი ადვოკატი და არც პროკურორები ამხელენ.

სხდომის დაწყებამდე საქმის ერთ-ერთმა პროკურორმა, ირაკლი მარშანიამ ჟურნალისტებს უთხრა, რომ პროკურატურას აქვს ყველანაირი დასაბუთება, რათა ბრალდებულს წინასწარი პატიმრობა შეეფარდოს. მისივე თქმით, მან ტერორისტული მიზნებისთვის შეიძინა საბრძოლო მასალები. მარშანიას ჟურნალისტებმა ასევე ჰკითხეს, სპეცოპერაციისას ლიკვიდირებულთა შორის არის თუ არა აჰმედ ჩატაევი, რაზეც პროკურორმა თქვა, რომ გვამები ჯერ იდენტიფიცირებული არ არის.

ბრალდების აღკვეთის ღონისძიებაზე მსჯელობა სასამართლოში 13 საათზე უნდა დაწყებულიყო. სხდომათა დარბაზთან მისულმა ჟურნალისტებმა გაიგეს, რომ მოსამართლის გადაწყვეტილებით, დარბაზი შეიცვალა, რათა ჟურნალისტებს ბრალდებული ვერ დაეფიქსირებინათ. მანამდე კი, მისივე გადაწყვეტილებით სხდომა დაიხურა.

თბილისში, ისანში, ბერი გაბრიელ სალოსის ქუჩაზე, 21-22 ნოემბრის სპეცოპერაციის შედეგად, დაიღუპა ერთი სპეცრაზმელი და დაჭრილია ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი, ერთი კი დაკავებულია.

გაიგეთ მეტი: რა ვიცით და რა არ ვიცით ისნის სპეცოპერაციის შესახებ